Futbol üzrə Azərbaycan Kubokunda yarımfinal mərhələsinin digər oyunu keçirilib.
Sportnet.az-ın məlumatına görə, "Neftçi" səfərdə "Zirə"nin qonağı olub. Zirə İdman Kompleksinin stadionunda baş tutan görüşdə hesab açılmayıb.
Hər iki komanda ehtiyatlı oyuna üstünlük verdiyindən qapılar qarşısında demək olar ki, 100 faizlik qol epizodları olmayıb. Yalnız 81-ci dəqiqədə qonaqların kapitanı Emin Mahmudovun zərbəsi təhlükəli alınsa da, Mehdi Cənnətov rəqibin fərqlənməsinə imkan verməyib.
Yarımfinal mərhələsinin ilk qarşılaşmasında "Qarabağ" Qəbələdə eyniadlı komandaya 3:1 hesabı ilə qalib gəlib.
Qeyd edək ki, cavab oyunları aprelin 29-da gerçəkləşəcək.
---------------------------------------
Futbol üzrə Azərbaycan Kubokunda yarımfinal mərhələsinə start verilib.
Sportnet.az-ın məlumatına görə, günün ilk matçı Qəbələdə baş tutub.
Şəhərin eyniadlı komandası "Qarabağ"ı qəbul edib. Qəbələ şəhər stadionundakı qarşılaşma qonaqların 3:1 hesablı qələbəsi ilə yekunlaşıb.
Meydan sahiblərinin heyətində 5-ci dəqiqədə Asif Məmmədov hesabı açıb. 16-cı dəqiqədə İsmayıl İbrahimli bərabərlik qolunu vurub. 87-ci dəqiqədə İbrahima Vadji Ağdam təmsilçisini önə keçirib. 90+3-cü dəqiqədə isə Kadi Borges penaltidən fərqlənib.
Komandalar arasındakı cavab qarşılaşması aprelin 29-da "Azersun Arena"da olacaq.
Qeyd edək ki, günün digər oyununda "Zirə" "Neftçi"ni qəbul edəcək.
-------------------------------------------------------------------
Bu gün futbol üzrə Azərbaycan Kubokunda yarımfinal mərhələsinin ilk oyunları keçiriləcək. Sportnet.az-ın məlumatına görə, hər iki qarşılaşma eyni gündə baş tutacaq.
Açılış matçı Qəbələdə eyniadlı komanda ilə "Qarabağ" arasında olacaq. Saat 17:30-da başlayacaq görüşü Kamal Umudlu idarə edəcək.
Əyalət təmsilçiləri indiyədək 6 dəfə kubokda rəqib olublar. Bunlardan dördü 1/4 finala, biri yarımfinala, biri isə finala təsadüf edib. Ümumilikdə baş tutan 11 görüşün ikisində meydan sahibləri, dördündə qonaqlar qələbə qazanıblar. Beş oyunda heç-heçə qeydə alınıb. Topların nisbətində də Ağdam klubunun üstünlüyü var - 14:8. Son üç matçda "Qarabağ" rəqibini məğlub edib.
Digər görüşdə "Neftçi" "Zirə" ilə münasibətlərinə aydınlıq gətirəcək. Zirə İdman Kompleksinin stadionunda oynanılacaq qarşılaşmanın baş hakimi FIFA referisi Rauf Cabbarov olacaq.
İlk dəfə yarımfinalda görüşən paytaxt klublarının yolları 1/4 finalda üç dəfə kəsişib. Əvvəlki 6 oyunun üçü "qartallar"ın, ikisi "ağ-qaralar"ın xeyrinə başa çatıb. Bir görüşdə qalib müəyyənləşməyib. "Neftçi"nin vurduğu 6 qola "Zirə" 4 topla cavab verib.
Azərbaycan Kuboku, yarımfinal
İlk oyunlar
20 aprel (çərşənbə)
17:30. "Qəbələ" – "Qarabağ" - 1:3
Qollar: Asif Məmmədov, 5 - İsmayıl İbrahimli, 16. İbrahima Vadji, 87. Kadi Borges, 90+3 (p)
Hakimlər: Kamal Umudlu, Rəhman İmami, Vüsal Məmmədov, Rauf Allahverdiyev
Hakim-inspektor: Anar Salmanov
AFFA nümayəndəsi: Məmmədəli Məmmədov
Qəbələ şəhər stadionu.
20:00. "Zirə" – "Neftçi" - 0:0
Hakimlər: Rauf Cabarov, Namiq Hüseynov, Cavanşir Yusifov, Vüqar Həsənli
Hakim-inspektor: Babək Quliyev
AFFA nümayəndəsi: Elgiz Abbasov
Zirə İdman Kompleksinin stadionu.
Qeyd edək ki, cavab oyunları aprelin 29-da gerçəkləşəcək.
