Milli komandaların oyunları ilə əlaqədar Topaz Premyer Liqasında fasilə yarandığı üçün futbolçularını qısa istirahətə buraxan "Qəbələ” hazırlıqlarını ötən gün bərpa edib. Sportnet.az-ın klubun rəsmi saytına istinadən verdiyi məlumata görə, martın 19-da baş tutan XXVI turun "İnter”lə səfər oyunundan (2:1) sonra 3 gün məşqlərə ara verən "qırmızı-qaralar” Qəbələdə toplaşıb.
Hazırlığın ilk günündə Roman Qriqorçukun komandası bir məşqlə kifayətlənib. Məşqdən öncə komanda üzvləri bir gün əvvəl 50 yaşını tamamlayan mütəxəssisi təbrik edib. Ruslan Əmircanov bütün futbolçular adından ukraynalı baş məşqçini təbrik edib, yubileylə bağlı xoş arzularını çatdırıb.
Axşam məşqində "Qəbələ”nin bütün futbolçuları iştirak etməyib. Ruslan Abışov və Cavid Hüseynov Azərbaycan millisinin heyətində Avropa çempionatının Malta ilə seçmə oyununa hazırlaşdığından, Tellur Mütəllimov 21 yaşadək futbolçulardan ibarət yığmanın toplanışına qatıldığından "qırmızı-qaralar”ın düşərgəsində deyil. Müalicəsi davam edən braziliyalı Dodo da Qəbələdə baş tutan məşqə qatılmayıb. Zədəsi olan Elvin Camalov isə fərdi məşqlə kifayətlənib.
Qeyd edək ki, sabahdan "Qəbələ” hazırlıqlarını gündə iki məşqlə davam etdirəcək.
