Azərbaycan Premyer Liqasında XXII tura start verilib.
Sportney.az xəbər verir ki, ilk gündə bir oyun keçirilib.
Lider “Qarabağ” turun ən diqqətçəkən matçında “Sabah”ı qəbul edib. Maraqlıdır ki, bol qollu alınan qarşılaşmada 6 qolun ilk 4-ü penaltidən vurulub.
31-ci dəqiqədə meydan sahiblərindən Marko Yankoviç hesabı açıb. Ancaq birinci hissəyə əlavə olunmuş birinci dəqiqədə İshak Belfodil qapıçı ilə dueldən qalib ayrılıb. Fransalı hücumçu 54-cü dəqiqədə dubla imza atıb. Lakin ev sahibləri 10 dəqiqə sonra hesaba tarazlıq gətiriblər. Bu dəfə təyin olunan onbirmetrlik zərbəni çempionatın bombardiri Olavio Juninyo dəqiq yerinə yetirib.
90+5-ci dəqiqədə qonaqlar Tellur Mütəllimovun uzaq məsafədən qarşısıalınmaz zərbəsi sayəsində yenidən önə keçiblər. Buna baxmayaraq, qələbə hesabını qorumaq mümkün olmayıb. Son dəqiqələrdə bir neçə epizodda komandasını qoldan xilas edən Yusif İmanov 90+7-ci dəqiqədə Yassin Benzianın zərbəsindən sonra üstünə gələn top qarşısında aciz qalıb. Qolkiperin kobud səhvi sayəsində “Sabah” qələbəni əldən verib.
Beləliklə, görüş 3:3 hesabı ilə yekunlaşıb. Bu nəticədən sonra “Qarabağ” xallarının sayını 51-ə çatdırıb. 5-ci pillədəki “Sabah”ın isə 28 xalı var.
Qeyd edək ki, turun digər oyunları fevralın 12-13-də keçiriləcək.
-----------------------------------------
Bu gün futbol üzrə Azərbaycan Premyer Liqasında XXII tura start veriləcək.
Sportnet.az xəbər verir ki, ilk oyun günündə bir qarşılaşma keçiriləcək.
Açılış matçı son çempion “Qarabağ”la “Sabah” arasında olacaq. Tofiq Bəhramov adına Respublika Stadionunda oynanılacaq görüş saat 19:00-da başlayacaq.
Bu, komandaların ölkə çempionatları tarixində 22-ci dueli olacaq. Əvvəlki 21 oyunun 14-ü Ağdam təmsilçisinin, biri Bakı klubunun xeyrinə başa çatıb. Altı qarşılaşmada qalib müəyyənləşməyib. Topların nisbətində də “Qarabağ”ın aşkar üstünlüyü var – 39:13.
“Sabah” ardıcıl iki dəfə rəqibinə uduzub. “Qarabağ” son 4 görüşdə qol vurub.
Qeyd edək ki, turun digər görüşləri fevralın 12-13-də keçiriləcək.
Azərbaycan Premyer Liqası
XXII tur
11 fevral
19:00. "Qarabağ" - "Sabah" - 3:3
Qollar: Marko Yankoviç, 31 (penalti). Juninyo, 64 (penalti). Yassin Benzia, 90+7 - Ishak Belfodil, 45+1; 54 (hər ikisi penalti). Tellur Mütəllimov, 90+5
Tofiq Bəhramov adına Respublika Stadionu
