"Qarabağ"ın baş məşqçisi Qurban Qurbanov səfərdə "Şamaxı"ya 2:0 hesabı ilə qalib gəldikləri Azərbaycan Premuer Liqasının III tur matçından sonra mətbuat konfransı keçirib.
Sportnet xəbər verir ki, 53 yaşlı mütəxəssis bir sıra suallarla bağlı maraqlı açıqlamalar verib:
- Oyun barədə nə deyə bilərsiniz?
- Futbolçularımı təbrik edirəm. Heç də asan oyun, asan qələbə olmadı. Belə şəraitdə və meydançada futbolçuları motivasiya etmək heç də asan deyil. Yenə də bacardılar. Bizim üçün milli fasilədən öncə qələbə qazanmaq baxımından çox vacib oyun idi. Futbolçularıma və çoxsaylı azarkeşlərimizə təşəkkür edir, rəqib həmkarım Azər Bağırova uğurlar arzulayıram. O, yeni komanda ilə Premyer Liqada iştirak edir. Əvvəlki oyunları da çox yaxşı səviyyədə keçirmişdilər, bu gün də çox yaxşı oyun qurmuşdu. Qapımız qarşısında xeyli sayda təhlükəli vəziyyətlər yaratdılar. Məncə, get-gedə daha yaxşı kollektivə çevriləcək və daha yaxşı oyunlar keçirəcəklər.
- "Benfika" ilə oyuna hazırlaşan "Qarabağ" üçün "Karvan-Yevlax"la matça köklənmək çətin deyilki?
- Açığı, "Benfika" ilə oyuna hazırlıq barədə hələ düşünmürdük. Sadəcə, diqqətimizi bu görüşə yönəltmişdik. "Ferentsvaroş"la matçdakı elə bir atmosferdən çıxaraq, bu cür meydançada və şəraitdə oynamağa futbolçuları motivasiya etrmək heç də asan deyildir. Amma illərdir belə hallar olur. Əlbəttə, daha yaxşı meydançanın, daha çox azarkeşin olmasını istərdik. Bu iki amil futbolçular üçün daha önəmlidir. İstirahətdən sonra "Benfika" ilə oyuna hazırlaşacağıq.
- Kamilo Duran debüt etsə də, Coni Montiel hələ ki görməmişik. Onun durumu necədir?
- Burada ciddi problem yoxdur. Sadəcə, hazır deyil. 6 aydan çox oynamayıb, fərdi məşqlər edib. Amma komandaya qoşulub. Ona vaxt lazımdır, fasilədə özünə gələcəyinə inanıram. Milli fasilədən sonra vaxtaşırı şans verəcəyik.
- Son günlər "Neftçi"nin "Qarabağ"ı təbrik etməməsi müzakirə olunur. Sizcə, bu, düzgün addımdır?
- Samir Abasov həmişə telefonla təbrik edir, köməkçim Elçin Rəhmanovla əlaqə saxlayır, hər oyundan sonra təbriklərini çatdırır. Digər tərəfdən, buna ciddi yanaşmamışdım. Hər klubun öz yanaşması var. Buna görə "Neftçi"dən incimək və "təbrik gözləyirdim" demək fikrim yoxdur. Hərənin yanaşması bir cürdür, hər klubun öz idarəetməsi var. "Neftçi" hamımızın "Neftçi"sidir, Samir Abasov da, klub rəhbərliyi də dostumuzdur, hamısını yaxşı tanıyırıq, çox yaxşı münasibətdəyik. Gəlib oyunlarımıza da baxırlar. "Ferentsvaroş"la oyundan sonra rəhbərliklərindən şəxsən mənimlə əlaqə saxlayanlar və təbrik edənlər çox olub. Rəsmi formada olmayıbsa belə, bu məsələni elə də ciddiyə almıram.
- Samba Sumanonun "Qarabağ"a keçidi məsələsi nə dərəcədə doğrudur?
= Sambu ilə danışıqlar ağır gedir. Çox ciddi təklif də etmişik. Ola bilsin, Çempionlar Liqası qrupuna düşdük deyə, qarşı tərəf həddindən artıq yuxarıdan getməyə başladı. Amma biz yenə danışıqlarımızı aparırıq. Baxmayaraq ki, vaxt çox azdır. Hər bir halda son dəqiqəyədək danışıqlarımız gedəcək. Amma birdən-birə danışıqlar çox çətinləşməyə başladı.
- "Qarabağ"ın oyunlarının təqvimindən razısınız?
- Normaldır. Çempionlar Liqasının Liqa mərhələsidir. "Keçəl Həsən, Həsən keçəl" (gülür - red.). Fərqi yoxdur.
- Legioner limitinin ləğvi Azərbaycan futboluna nə verdi, nə aldı?
- Hələ fikir bildirmək üçün tezdir. Çempionatın gedişində baxacağıq. Komandalar ötən mövsümə nəzərən daha da ciddiləşib, daha da fərqli olub.
- Hikmət Cəbrayılzadənin potensialını necə dəyərləndirirsiniz?
- İki oyundur meydana start heyətində çıcan Hikmət Cəbrayılzadənin performansını normal dəyərləndirirəm. Oyundan qorxmursa, oyunun içindədirsə, bu, müsbət haldır. Hələ Hikmət potensialının 50 faizini göstərir. Get-gedə daha da uyğunlaşdıqdan, özünü tam hazı hiss etdikdən sonra daha yaxşı formada, daim əsas komanda ilə olacaq. Hazırda həmişə komanda ilədir, oyunlarda 23-lükdə olur. Ümidimiz var, onu daha da yaxşılaşdırmağa çalışırıq.
