"Araz Naxçıvan” klubunun baş məşqçisi Əsgər Abdullayevin Sportnet.az-a müsahibəsi
- Növbəti mövsümdən Premyer Liqada çıxış edəcəksiniz. Güclülər dəstəsi ilə pağlı planlarınız necədir?
- O bərədə dəqiq heç nə deyə bilmərəm. Bizim əsas fikrimiz Naxçıvan futbolunu inkişaf etdirməkdir. İstəyirik ki, əsasən yerli futbolçulardan bir komanda düzəldək. Komandanı tam toparlayandan sonra iddialı olub-olmamaqla bağlı fikirləşmək olar. Hazırda əlimizdə elə bir material yoxdur. Gərək, komandaya baxıb, nəsə fakir yürüdəsən.
- Medallar uğrunda mübarizə aparan komandaların büdcələri 25 milyon manat civarındadır. Sizin nə qədər büdcəniz var?
- Büdcə məsələsi mənim səlahiyyətimə aid deyil. Fikirimcə, büdcə böyük ola bilər, amma heç nə əldə edə bilməzsiniz. Bu məsələ komandanın seleksiyasından asılıdır. Düzdür, büdcə böyük amildir, amma hər şeyi də həll etmir.
- Ümumiyyətlə, yeni transferləriniz arasında güclü legioner və ya yerli futbolçu olacaqmı?
- Hələ ki yerli futbolçuların üzərində dayanmışıq. Ümumiyyətlə, futbolçular gərək böyük pullardan danışmasın. Birinci özlərini təsdiq etsinlər. Bəzi futbolçular var. Deyirlər ki, legionerlər kimdir, biz daha yaxşıyıq. Bu məsələlər danışmaqla həll olunmur. Əgər mən hansısa futbolçu ilə masa arxasına əyləşəndə puldan danışacaqsa, heç onunla görümək də lazım deyil. Ona görə yox ki, biz o pulu verə bilmərik. Futbolçu birinci özünü təsdiqləyib, sonra puldan danışmalıdır. Mən də bu gün özünü təsdiqləmək istəyən futbolçularla görüşüb, belə bir komanda yığmaq istəyirəm.
- Gələn mövsümdən yüksək liqada mübarizə aparacaqsınız. Yəqin ki, ötən mövsümə nisbətən büdcənizdə artım olacaq?
- Mütləq fərq olmalıdır. Çünki maaş məsələlərində bu, vacib amildir. Düzdür, mən nə qədər maliyyə ayrılacağını dəqiq bilmərəm, amma hansı futbolçuları dəvət eləmək istdəyimi rəhbərliyə demişəm.
- Hazırda yaxşı yerli futbolçulara tələb çoxdur. Sizdə Premyer Liqaya yeni vəsiqə qazanmış klubsunuz. Bu rəqabətdə özünüzə güclü futbolçu tapa biləcəksiniz?
- Mən ulduz deyil, ulduz olmaq istəyən futbolçuya üstünlük verirəm. Hesab edirəm ki, bu da öz bəhrəsini verəcək.
- Məşqçi karyeranız ərzində çempionluq yaşamamısınız. Amma bu mövsüm "Araz Naxçıvan”la I divizionda da olsa, bunu bacardınız. Bu barədə fikriniz necədir?
- Deyirlər ki, general olmayan əsgər əsgər deyil. Hər bir məşqçi çalışır ki, nəticəsi olsun. Mən də bunu çox istəmişəm. AZAL-da olarkən axırıcı oyunda çempionluğu əldən verdik. Amma I Divizionda olsa da, buna nail ola bildik.
- Növbəti mövsüm üçün hazırlıq planlarınız necədir?
- İyunun 15-də komandanı yığmaq istəyirəm. Onadək seleksiya işlərimizi yekunlaşdırmaq niyyətindəyəm. Təlim-məşq toplanışımızın birinci hissəsi ölkə daxilində, çox ehtimal ki, Naxçıvanda olacaq. İkinci hissənin isə xarici ölkədə olmasını planlaşdırırıq. Burada isə əsasən yoxlama görüşlərimiz olacaq. Yoxlama oyunlarını isə güclü xarici komandalarla keçirmək və gücümüzü sınamaq istəyirik ki, nəyə qadirik. Yaxşı olardı ki, bu görüşləri xaricdəki çempion komandalara qarşı keçirə bilək.
