Bu gün "Bakı 2015" I Avropa Oyunlarında sambo yarışlarına start verilib. Sportnet.az-ın məlumatına görə, kişi və qadınlar arasında üst-üstə 8 çəki dərəcəsi üzrə keçirilən yarışda Azərbaycan bütün çəkilərdə təmsil olunub.
Onlardan 4-ü finalda, 2-si isə bürünc medal uğrunda görüşdə iştirak hüququna yiyələnib. Lakin təmsilçilərimiz nə qızıl, nə də bürünc medal qazana bilib.
Kişilərin mübarizəsində 57 kq çəkidə yer alan İslam Qasımov ilk görüşündə rumıniyalı Orlando Qruyanı 4:0, yarımfinalda Vaxtangi Çidraşvilini 3:1 hesabı ilə yenərək, finala yüksəlib. Həlledici görüşdə onun rəqibi rusiyalı Aymergen Atxundov olub. Görüş Atxunovun təmiz qələbəsi ilə yekunlaşıb. Qasımov gümüş medal qazanıb.
74 kq çəkidəki Amil Qasımov da finala yüksəlib. O, əvvəlcə gürcüstanlı Kaxa Mamulaşvilini, yarımfinalda bolqarıstanlı Martin İvanovu 3:1 hesabı ilə yenib. Finalda rəqib belaruslu Stsiapan Popov olub. Bu görüş də Azərbaycan təmsilçisinin məğlubiyyəti ilə yekunlaşıb.
100 kq-dan yuxarı çəkidə mübarizə aparan Vasif Səfərbəyov makedoniyalı Bayro Maşoviki 4:0, ukraynalı Razmik Tonoyanı 2:0 hesabı ilə yendikdən sonra finala çıxıb. Həlledici görüşdə rəqib rusiyalı Artyom Osipenko olub. Səfərbəyov da rəqibinə ağrıdoğurucu fəndlə yenilib.
90 kq çəkidə Kənan Qasımov ilk görüşdə ukraynalı İvan Vasilçuka 2:0 hesabı ilə qalib gəlsə də, yarımfinalda rusiyalı Alsim Çernoskulova 0:4 hesabı ilə uduzaraq, finala çıxa bilməyib. Bürünc medal uğrunda görüşdə isə o, gürcüstanlı Davit Karbelaşviliyə uduzaraq, 5-ci yerlə kifayətlənib.
Qadınların mübarizəsinə gəldikdə, 52 kq çəkidəki Nəzakət Xəlilova rumıniyalı Kodrina İoneskunu 3:1, litvalı Ruta Aksyonovanı 4:0 hesabı ilə yendikdən sonra finala yüksəlib. Qızıl medal uğrunda görüşdə rəqib rusiyalı Anna Xaritonova olub. Görüş Xaritonovanın təmiz qələbəsi ilə yekunlaşıb. Beləliklə, Xəlilova gümüş medal qazanıb.
60 kq çəkidəki Şahanə Hüseynova ilk görüşündə rusiyalı Yana Kostenkoya 0:4 hesabı ilə uduzub. Birinci təsəlliverici görüşdə o, gürcüstanlı Şorena Şaradzeni yenib. Bürünc medal qarşılaşmasında isə Hüseynova belaruslu Katerina Prokopenkoya uduzara, 5-ci olub.
68 kq çəkidəki Nərminə Əlizadə isə ilk görüşdə belaruslu Volqa Namazovaya 0:4 hesabı ilə uduzub. Bürünc medal uğrunda görüşdə onun rəqibi fransalı Selin Konde olub. Bu dəfə də təmsilçimiz uduzaraq medalsız qalıb.
Yalnız 64 kq çəkidəki Fəridə Qurbanova ilk görüşdəcə 0:4 hesabı ilə uduzduğu moldovalı Yekaterina Kretunun finaladək irəliləyə bilməməsi səbəbindən çıxışını erkən dayandırıb.
