"Qəbələ" klubunun futbolçusu George Floresku Gürcüstanın "Lelo" qəzetinə müsahibə verib. Sportnet.az-ın məlumatına görə, rumıniyalı futbolçu Avropa Liqasının I təsnifat mərhələsində "Dinamo" (Tbilisi) ilə ilk oyun və qarşıdan gələn cavab görüşü haqda fikirlərini bildirib.
- İlk oyunu necə qiymətləndirdiniz?
- Açıq deyim ki, birmənalı təəssürat yaranmadı.
- Niyə?
- Buna səbəb çoxdur. Biz növbəti mərhələyə ümid edirik. 1:2 hesabı o demək deyil ki, biz şanslarımızı itirmişik. Lakin "Dinamo"nun gənc futbolçularından belə yaxşı futbol gözləmirdim. Çox istedadlı və potensialı olan oyunçular var.
- "Dinamo" nəyin sayəsində qalib gəldi?
- Meydanda qalan 10 futbolçu ləyaqətlə çıxış edib və ən əsası düzgün oynadılar. Yaxşı hücum edib və tez geri çəkilirdilər. Bizim uğursuzluğumuzun səbəbi isə yaxşı müdafiə olunmamağımız və əlimizə düşən fürsətlərdən faydalana bilməməyimiz oldu. Bu halda oyunda qalib gəlmək mümkün deyil.
- Cavab görüşündə şanslarınızı necə qiymətləndirirsiniz?
- Proqnoz vermək çətindi. Ancaq çətin oyun olacağı məlumdur. Biz əlimizə düşən fürsətdən yararlanmağa və növbəti mərhələyə adlamağa çalışacağıq. Yenə təkrar edirəm, "Dinamo" maraqlı komandadır və məğlub etmək asan olmayacaq.
