Bu gün futbol üzrə Azərbaycan milli komandası AVRO-2016-nın seçmə qrup mərhələsində son ev oyununu keçirəcək. Sportnet.az-ın məlumatına görə, rəqib 4 qat dünya çempionu İtaliya yığması olacaq.
Görüş ilk dəfə Bakı Olimpiya Stadionunda təşkil olunacaq. 8 turdan sonra Italiya 18 xalla H qrupuna başçılıq edir. Azərbaycan isə 6 xalla 5-ci pillədə yer alıb. Qonaqlar qələbə qazanacaqları təqdirdə, qrup lideri kimi final mərhələsinə vəsiqəni təmin edəcəklər. Bu halda millimiz Robert Prosineçkinin başçılığı altında 5-ci matçında ilk məğlubiyyətlə üzləşəcək. Millimiz qalib gəlsə, İtaliya yığmasının seçmə mərhələlərdəki 48 oyunluq məğlubiyyətsizlik seriyasına son qoyacaq.
Bu komandalar arasında ötən il Palermoda keçirilmiş qarşılaşmada meydan sahibləri qələbə qazanıblar - 2:1. Həmin oyunda İtaliya millisinin müdafiəçisi Corco Kyellini hər 3 qolun müəllifi olub. O, yığmamızın qapısından 2, öz qapılarından 1 top keçirib.
Əvvəlki tsikllərdə isə İtaliya və Azərbaycan milliləri yalnız AVRO-2004-ün seçmə mərhələsində qarşılaşıb. Millimiz evdə 0:2, səfərdə 0::4 hesabı ilə uduzub.
Bugünkü qarşılaşma daha bir neçə cəhəti ilə əlamətdar olacaq. Yığmamızın aparıcı futbolçularından olan Dmitri Nazarov daha bir sarı vərəqə alsa, Bolqarıstanla oktyabrın 13-də keçiriləcək səfər matçını buraxmalı olacaq. İtaliya millisindən isə Matteo Darmian sarı vərəqə limitini doldurmağa yaxındır. Daniele De Rossi isə oyunluq cəzasını bugünkü qarşılaşmadan çəkməyə başlayacaq.
Ruslan Abışov bu gün 28 yaşını tamamlayacaq. Kapitan Rəşad Sadıqov isə 100-cü oyununu keçirəcək. Bu münasibətlə ona xüsusi mükafatın veriləcəyi gözlənilir. İtaiya yığmasından isə qapıçı Canluici Buffon 150-ci matçına çıxacaq.
Qeyd edək ki, H qrupunun digər görüşlərində Norveç Maltanı, Xorvatiya Bolqarıstanı qəbul edəcək.
AVRO-2016
Seçmə mərhələ, H qrupu
21:00. Azərbaycan - İtaliya - 1:3
Qol: Dmitri Nazarov, 31 - Eder, 11. Əl Şəravi, 42. Darmian, 65.
Qol: Dmitri Nazarov, 31 - Eder, 11. Əl Şəravi, 42. Darmian, 65.
Baş hakim: Uilyam Kollum (Şotlandiya)
Baş hakimin köməkçiləri: Damyen Makqreyt (İrlandiya), Frensis Konnor (Şotlandiya)
Dördüncü hakim: Alastair Mazer (Şotlandiya)
Əlavə köməkçi hakimlər: Bobbi Madden (Şotlandiya), Con Biton (Şotlandiya)
Bakı Olimpiya Stadionu
