"Barselona”nın müdafiəçisi Jerar Pike dünyanın ən yaxşı futbolçuları olan Lionel Messi ilə Kriştianu Ronaldunu müqayisə edib. Sportnet.az məlumatına görə, İspaniya milli komandasının üzvü onların hər ikisini inanılmaz futbolçular hesab edir.
Pikenin fikrincə, "Barselona”dakı komanda yoldaşı Messi ilə "Real Madrid”li Ronaldu yalnız dünyanın deyil, bütün futbol tarixinin ən yaxşı oyunçularıdır: "Mən həmişə demişəm ki, Messidə olan istedad heç kimdə yoxdur. O, topu inanılmaz sürətlə aparır. Messi topu 2 metrdən uzağa buraxmır. Onu saxlamaq həddən artıq çətindir. Mən heç kimdə belə istedad görməmişəm. Ronaldu isə tam başqa futbolçudur. O, hündürdür, güclüdür, müasirdir, hər şey edə bilər. Ronaldu başla, cərimə zərbəsindən, penatidən qol vura bilər. Ancaq şəxsən mən belə hesab edirəm ki, Messi insan deyil, Ronaldu isə insanlar arasında ən yaxşısıdır”.
