Azərbaycanın məşhur futbolçusu, hazırda "Sumqayıt” klubunun meneceri Ceyhun Sultanov mənzil firildaqçılığı ilə üzləşib. Sportnet.az-ın "AzerFax"a istinadən verdiyi məlumata görə, sabiq futbolçu 2008-ci ildə özünə mənzil almaq istəyib və bu məqsədlə "Şərurlu İsfəndiyar" kimi tanınan iş adamı İsfəndiyar Axudova məxsus yeni binalardan birini seçib.
Talıblı küçəsi 4 ünvanında (Yeni yasamal) yerləşən həmin bina tikilib hazır vəziyyətə gətirilsə də Sultanov hələ də mənzilini ala bilməyib. Məlumata görə, futbolçu yeni mənzilə görə əvvəlcədən 48 min manat ödəyib. O, ödədiyi vəsaiti də geri ala bilmir.
Aldadıldığını görən hazırkı menecer məsələ ilə bağlı məhkəməyə də müraciət edib. İşə Yasamal rayon məhkəməsində baxılıb və C.Sultanov zərəşəkmiş şəxs kimi tanınaraq onun mənzil almaq məqsədilə 48 min manat ödədiyi təsdiq olunub. Məhkəmə onun xeyrinə müvafiq qərar çıxarsa da problem bu günə qədər həllini tapmayıb.
İsfəndiyar Axundovun sahibi olduğu "Şərur” MTK-dan bildirilir ki, onlar Talıblı küçəsi 4 ünvanındakı binanın tikintisini "Olimpus” firmasına həvalə ediblər və C.Sultanov da vəsaiti məhz həmin firmaya ödəyib. Bu səbədən də "Şərurlu İsfəndiyar” "Sumqayıt" rəsmisinin iddiası ilə razılaşmır.
Qeyd edək ki, "Olimpus” Firmasının rəhbəri Rauf adlı şəxs bir müddət əvvəl həbs olunub və orada da dünyasını dəyişib. Faktı C.Sultanovun özü də təsdiqləyib.
