Braziliyanın San Paulu şəhərindəki "Itaquerao" stadionunun tikintisi futbol üzrə dünya çempionatının açılışınadək başa çatmayacaq. Sportnet.az-ın məlumatına görə, belə bir bəyanatla tikinti işlərinə cavabdeh olan "Odebrecht" şirkəti çıxış edib.
Amma inşaatçılar yalnız tavan işlərini yekunlaşdıra bilməyəcəklər. Bu isə mundial matçlarının keçirilməsinə mane olmayacaq. Meksikanın "El Universal" nəşri xəbər verir ki, çempionatın açılışınadək stadion üzərindəki örtüyün şüşə panellərdən ibarət yalnız bir hissəsi quraşdırılacaq. Qalan seksiyalar isə mundialdan sonra quraşdırılacaq.
Qeyd edək ki, dünya çempionatı iyunun 12-dən iyulun 13-dək Braziliyanın 12 şəhərində - Rio-de-Janeyro, Resifi, Salvadore, San-Paulu, Portu Aleqri, Manause, Fortaleze, Natale, Belu-Orizonti, Brazilia, Kuyaba və Kuritibada keçiriləcək.
