Rusiyanın Kemerovo vilayətindəki Şeregeş kurortunda musiqi festivalının təşkilatçıları və iştirakçıları çimərlik paltarı ilə kütləvi dağ xizəyi enişi üzrə növbəti rekord vurmağa cəhd ediblər. Sportnet.az-ın məlumatına görə, bikini fleşmobçuları əvvəlki nailiyyətlərini 2 dəfədən artıq üstələyiblər.
Şeregeş dağ xizəkçiliyi kurortundan bildirilib ki, Yaşıl dağdan 1835 xizəkçi və snoubordçu kütləvi eniş edib. Onlar yalnız çimərlik paltarında olublar. Qeyri-adi tədbirin miqyasını pilotsuz helikopterdə qurulmuş videokameralar qeydə alıb. İndi təşkilatçılar iştirakçılardan sübut üçün anket və digər sənədlər toplayırlar. Sənədlər nailiyyətin qeydə alınması üçün Böyük Britaniyanın paytaxtı Londondakı Ginnesin Rekordlar Kitabı Komissiyasının məhkəməsinə göndəriləcək.
Qeyd edək ki, 2013-cü ildə Şeregeşdə keçirilmiş analoji bikini fleşmobuna 700-dək insan qatılıb.
