"Bu, dost ölkə döyüşçüsü ilə görüş idi. Mən rinqdə özümü evdəki kimi hiss edirdim, hər hansı bir qəzəb hissi yox idi, ona görə də, döyüşün bütün gedişatına nəzərət edirdim". Sportnet.az-ın məlumatına görə, bu sözləri ötən gün İstanbulda türkiyəli kikboks ustası Mert Akın üzərində qələbə qazanan Azərbaycan idmançısı Zabit Səmədov bildirib.
"Əlbəttə, döyüşü mənim üçün asan adlandırmaq olmaz. Çünki türk idmançı məndən 27 kiloqram ağır idi", - deyə o əlavə edib.
Gələcək döyüşləri barədə danışan Zabit qarşıda onu Dubay turnirinin gözlədiyini açıqlayıb: "Aprelin 16-da Dubayda dünyada yüksək reytinqə malik olan böyük turnir keçiriləcək. Mənim əsas məqsədim bu turnirdə qalib gəlməkdir". O bildirib ki, tezliklə sözügedən turnirin hazırlıqlarına başlayacaq.
Qeyd edək ki, bu, Zabit Səmədovun peşəkar rinqdə ardıcıl qazandığı 7-ci qələbəsidir. (Report.az)
