19 yaşadək futzalçılardan ibarət Azərbaycan milli komandasının baş məşqçisi İlqar Aslanovla bağlı hələlik heç bir qərar qəbul olunmayıb.
Azərbaycan Futzal Fedarasiyasının mətbuat katibi Mahal Məmmədovun Sportnet.az-a verdiyi məlumata görə, hazırda 60 yaşlı mütəxəssisin müqaviləsi davam edir.
U-19 komandasının həm də Azərbaycan çempionatında mübarizə apardığını xatırladan Məmmədov bildirib ki, mövsüm başa çatdıqdan sonra rəhbərlik bu məsələni müzakirə edə bilər: "Hələ ki heç bir qərar yoxdur".
Fedarasiya rəsmisi U-19 millisinin Avropa çempionatının əsas mərhələsindəki çıxışını da dəyərləndirib: "Hazırkı U-19 Avropa çempionatında ilk dəfə mərhələ adladı, əsas mərhələdə ilk xalı qazandı. Bosniya və Herseqovina istisna olmaqla, digər iki matçda oyun və qol epizodları yaratmaq baxımından heç bir rəqibindən geri qalmadı. Həm Xorvatiyanı, həm Türkiyə uda da bilərdik. Təcrübəsizlik, qol epizodlarını realizə edə bilməməyimiz həlledici rol oynadı".
Məmmədovun sözlərinə görə, bu komandanın məqsədi əsas milliyə futzalçı hazırlamaqdır: "Artıq 2-3 oyunçu əsas milliyə namizədəddir ki, növbəti seçmə mərhələdə onların cəlb olunacağı gözlənilir".
Qeyd edək ki, Azərbaycan millisi Avropa çempionatının əsas mərhələsində Bosniya və Herseqovinaya 2:10, Türkiyəyə 1:3 hesabı ilə uduzub, Xorvatiya ilə heç heçə edib - 3:3. Nəticədə 1 xal toplayan Azarbaycan millisi mübarizəni başa vurub.
3 oyundan 7 xal yığan Türkiyə milli komandası qrupun son görüşünün nəticəsindən asılı olmayaraq, sentyabrda Moldovanın paytaxtı Kişineuda keçiriləcək Avropa çempionatının final mərhələsinə vəsiqə qazanıb.
