“Ümid edirəm ki, növbəti oyunlarda daha da yaxşı çıxış edəcəyik”.
Sportnet.az-ın məlumatına görə, bu sözləri “Turan Tovuz”un baş məşqçisi Kurban Berdiyev Azərbaycan Premyer Liqasının XXIX turunda səfərdə “Səbail”lə 0:0 hesablı heç-heçə etdikləri oyundan sonra mətbuat konfransında deyib.
73 yaşlı mütəxəssis birinci hissədə ehtiyatla oynadıqlarını bildirib: “İki xal itirdiyimizi çox yaxşı başa düşürük. İlk yarıda ehtiyatlı, ikinci hissədə bir qədər yaxşı oynadıq, ancaq qol çatışmadı”.
Türkmənistanlı baş məşqçi komandasının son 5 oyunda 2 xal toplamasını belə şərh edib: “Bu barədə düşünür, oyunçularla da danışırıq".
O, futbolçuları Tural Bayramlı və Anton Kraçkovskinin oynamaması barədə danışıb: “Rəqabət çox güclüdür. Hamını eyni anda meydana buraxmaq olmur. Anton xəstə idi, məşqlərə dünən qoşuldu".
Berdıyev komandaya yeni transfer olunan oyunçuların uğursuz olması barədə verilən suala belə cavab verib: “Deməzdim ki, uğursuz transferlərdir. Hayderson Hurtado və Joarlem Suares sintetik meydana cəld reaksiya verirlər”.
O, matçın sonunda Veysəl Rzayevlə azarkeşlər arasında yaranan mübahisədən məlumatsız olduğunu vurğulayıb.
