“Rəqibin kimliyindən asılı olmayaraq oyunlara ciddi hazırlaşır, məsuliyyətlə yanaşırıq. Çünki bura gələndə qarşımıza konkret tapşırıq qoyulub. Komandamız növbəti mərhələyə yüksəlməlidir. Bunun üçün də yaxşı hazırlıq keçmişik. Artıq iki oyunda maksimum xal toplamışıq. Hər iki görüş məhsuldar olub”.
Sportnet.az xəbər verir ki, bunu "Araz-Naxçıvan"ın futzalçısı Ədalət Ələkbərov Çempionlar Liqasında Avstriya çempionu “Ljuti Krajişnici”yə qarşı keçirəcəkləri oyundan əvvəl federasiyanın mətbuat xidmətinə açıqlamasında deyib.
Gənc futzalçı debüt etdiyi Çempionlar Liqasının ab-havasından da danışıb: “Komandanın ən gənc üzvlərindən biriyəm. Baş məşqçimiz daim nəzarətdə saxlayır. Hər iki oyunda şans verib. Bu cür yarışlarda qazanılan təcrübə əvəzsizdir. Çalışıram bu şansdan həm komandamın xeyrinə, həm də öz inkişafım üçün istifadə edim. Komandanın dəstəyini hiss edirəm, bu da gənc futzalçı üçün əvəzolunmaz stimuldur”.
Futzalçı son oyuna da ciddi hazırlaşdıqlarını və qələbə qazanmaq üçün mübarizə aparacaqlarını vurğulayıb: “Hazırda turnir cədvəlində liderik. Sabahkı oyundakı rəqibimiz də bizimlə eyni sayda xal toplayıb. Düzdür, bizi heç-heçə də qane edəcək. Ancaq qələbə qazanıb, qarşıya qoyulan məqsədə çatmaq üçün əlimizdən gələni edəcəyik. Meydan amili, azarkeş dəstəyi onların tərəfində olacaq. Ancaq Bakıda həm fiziki, həm də taktiki-texniki planda yaxşı məşqlər keçirdik. Onun bəhrəsini arxada qalan 2 oyunda gördük”.
Qeyd edək ki, “Araz-Naxçıvan” ilk 2 oyunda maksimum xal toplayaraq turnir cədvəlinə başçılıq edir. “Ljuti Krajişnici”yə qarşı oyun avqustun 30-da olacaq. Bu matçda "qırmızı-ağlar"ı heç-heçə də qane edir. Görüşlər Avstriyanın Lints şəhərində keçirilir.
