Macarıstan "Ferentsvaroş"unun baş məşqçisi Robbi Kin UEFA Çempionlar Liqasında "Qarabağ"a qarşı keçirdikləri pley-off oyunlarını xatırlayıb.
Sportnet.az-ın məlumatına görə, irlandiyalı mütəxəssis bu gün ölkə çempionatında "Debretsen"ə qarşı keçirəcəkləri səfər matçından əvvəl açıqlama verib.
O bildirib ki, komandası Azərbaycan çempionları ilə görüşlərə əla köklənib. Bununla belə, Kin ələ düşən imkanlardan yararlana bilmədikləri üçün məyusluğunu dilə gətirib: "Cavab görüşündə qalib gəlməyimizə və hər bir futbolçumuzun əla oynamalarına baxmayaraq, ümumi nəticədə bir top fərqi ilə uduzduq. Lakin oyuna əla köklənmişdik. Əlbəttə, istənilən halda şamslarımızdan istifadə etmədiyimizə görə məyusuq. Axı hər bir oyunçu və baş məşqçi ən yüksək səviyyədə çıxış etmək istəyir".
45 yaşlı baş məşqçi fokusu tez dəyişmələrinin və bugünkü oyuna yönəlmələrinin vacibliyini dilə gətirib.
Qeyd edək ki, "Ferentsvaroş" "Qarabağ"a öz meydanında 1:3 hesabı ilə uduzub, Bakıdakı cavab görüşündə isə qələbə qazanıb - 3:2. İki oyunun nəticəsində üstünlük Ağdam komandasının tərəfində (5:4) olduğu üçün Budapeşt təmsilçisi Çempionlar Liqasında mübarizəni dayandırıb.
