Azərbaycanlı idman şərhçisi Elvin Kərimov "Matç TV"nin ştatından kənarlaşdırılıb. Sportnet.az-ın məlumatına görə, siyahıda Vasili Utkin, Aleksey Andronov, kirill Dementyev, Aleksandr Yelagin və Vladislav Baturin də var.
Onlar telekanalla qonorarla əməkdaşlıq edəcəklər. Georgi Çerdantsev isə əvvəlki şərtlərlə işini davam etdirəcək.
Yanvarın 22-də "Matç TV" rəhbərliyinin əməkdaşlarının, o cümlədən, aparıcı və şərhçilərin say tərkibini optimallaşdırmağa qərar verdiyi xəbəri yayılıb. Söhbət kütləvi ixtisarlardan yox, bəzi əməkdaşların müqavilələrinə yenidən baxmaqdan gedirdi. Yanvarın 20-də isə Utkin 2016-cı il Rio-de-Janeyro Yay Olimpiya Oyunlarına həsr olunmuş "Rio gözləyir" verilişinin aparıcılığından kənarlaşdırılıb. O, həmçinin Almaniya "Bavariya"sı ilə ispaniya "Barselona"sı arasında 2015-ci il dekabrın 9-da keçirilmiş Çempionlar Liqası matçında canlı efir zamanı kobud səhvə yol verdiyi üçün şərhçilikdən də məhrum olub.
Qeyd edək ki, "Matç TV" Ümumrusiya Dövlət Teleradio Şirkəti və "NTV-Plyus"un bazasında yaradılıb və 1 noyabr 2015-ci ildən efirdədir. Kanalın baş prodüseri Tina Kandelakidir. Elvin Kərimov isə 2010-cu ildən "NTV-Plyus"da futbol şərhçisi kimi çalışmağa başlayıb. "Matç TV"də erməni şərhçi Nobel Arustamyan da var. Amma o, ştatdan kənarlaşdırılmayıb.
