"Rəvan"ın futbolçusu Nuran Qurbanov "İnter"in 2:1 hesabı ilə yendikləri Azərbaycan Kubokunun ilk 1/4 final matçından sonra brifinq keçirib. Qurbanov Sportnet.az-ın da suallarını cavablandırıb...
- Güclü rəqib üzərində qələbə qazandınız. Oyunla bağlı nə deyə bilərsiniz?
- Çətin oyun oldu. Baxmayaraq ki, "İnter"ə qarşı oynayırdıq, meydana motivasiya ilə çıxmışdıq. Uduzacağımızı fikirləşmirdik. Allah kömək oldu, biz də qələbə qazandıq. "Rəvan" tarixində ilk dəfədir ki, "İnter"i udur.
- Gözəl qol vurdunuz...
- Bəli. Allaha şükür. Olur hərdən.
- Mərhələ şanslarınız nə qədərdir?
- Futboldur, hər şey ola bilər. Hazırlaşmaq lazımdır. Komandada vəziyyət yaxşı deyil. Hamımız öz adımızdan oynayırıq. Çalışırıq ki, burada nəsə edib başqa komandalara gedək.
- Vəziyyətin yaxşı olmadığını dedikdə, nəyi nəzərdə tutursunuz?
- Şərait baxımından. Yenə rəhbərlik əlindən gələni edir. Bundan artığını edə bilmirlər. Biz də çalışırıq ki, qələbə qazanaq, "Rəvan" adına nəsə göstərək, oyun sərgiləyək.
- Maaşlarınızı ala bilirsiniz?
- Maaş o qədər də yüksək deyil, adi vətəndaşın aldığı qədərdir.
- Demək, "Rəvan"da qalmağınıza səbəb daha yaxşı klublara getməkdir...
- Bəli, fikrimizdə odur. Təkcə mənim yox, futbolçuların məqsədi budur. "Rəvan"da vəziyyət yaxşı olsa, qalarıq. Əks halda, yayda başqa komandalara getmək üçün hamımız məşqlərdə və oyunlarda əlimizdən gələni edəcəyik.
- Demək, yayda "Rəvan"dan ayrılacaqsan?
- İnşallah, məndə müqavilə 6 aylıqdır.
- Oyunlara start heyətində daxil ola bilmirsən. Adətən, ikinci hissədə meydana daxil olursan. Bunu nə ilə əlaqələndirərdin?
- Bir az çətin sual verdiniz (gülür) Cavab sadədir: Baş məşqçinin qərarıdır. Özüm 90 dəqiqə oynamağa hazıram. Baş məşqçi buraxmır, mən də çıxmıram.
- "Bakı" Premyer Liqaya qayıtsa, siz də qayıdarsınız?
- Əlbəttə, qayıdaram. Ötən il "Bakı"da oynayanda deyirdilər ki, maliyyə problemi var. Klubu AFFA götürdülər. Mən "Bakı"ya yayda keçmişdim. 8 ay maaş aldım. Çətin vəziyyətlə əlaqədar 2 ayın pulunu ala bilmədim. Bu da normal bir şeydir. Orada aldığım məvacib 2800 manat və ya həmin vaxtın kursu ilə 3500 dollar idi. 5-6 futbolçu bu qədər alırdı. Qalanları da 1500 manat, 1000 manat civarında idi. Hamı 8 ay ərzində hamı pulunu aldı. Əvvəllər klubun kimlərə borcunun olduğunu isə deyə bilmərəm.
- Dediniz ki, "Rəvan"da vəziyyət yaxşı deyil. Belə başa düşmək olarmı ki, yağışdan çıxıb yağmura düşmüsünüz?
- Xeyr. Gələndə hara gəldiyini, səni nələrin gözlədiyini, çətin vəziyyətdə olacağını bilirsən. Amma futbolda bu gün yaxşı klubda, sabah zəif klubda ola, yenidən bura qayıda bilərsən. "Qəbələ"yə də "Rəvan"dan getmişdim. Daim inkişaf etmək, irəliyə doğru getmək lazımdır.
- Danışıq apardığınız klub var?
- Yox, heç kiminlə danışıq aparmıram. Yayı gözləyirəm.
