"Ən xoşbəxt illərini yaşamışam. Çünki Azərbaycan futboluna qulluq etmişəm. Bu işdə həmişə sadiq olmuşam və əlimdən gələni etməyə çalışıram. Sevdiyim işlə ölkəyə, millətə, futbolumuza qulluq edirəm". Bunu Sportnet.az-a açıqlamasında AFFA Məşqçilər Komitəsinin sədri Vaqif Sadıqov deyib.
Bu gün 57 yaşını qeyd edən V.Sadıqov ad günü ölkədən kənardan da təbriklər aldığını bildirib: "57 yaşımda ilk dəfədir ki, evdəyəm. Həmişə işdə, təlim-məşq toplanışında, oyunlarda olmuşam. Çünki aprel ayında həmişə sıx qrafik olub. Bu gün tək Azərbaycandan yox, xaricdən də təbriklər gəlir. Oynayan, işləyən yerdən təbriklər var. Moldovadan dostlarım, Rusiyada yaşayan ilk məşqçim və dostlarım təbrik edib. Futboldakı tanışlar, yoldaşlar, AFFA ilə bağlı olan insanlar təbrik edirlər. Bu siyahıda jurnalistlər də var".
