AFFA-nın İntizam Komitəsinin bugünkü iclasında aşağıdakı qərarlar qəbul olunub. Sportnet.az-ın məlumatına görə, Azərbaycan Premyer Liqasının XXVIII turunun AZAL – "Kəpəz" matçının 90+3-cü dəqiqəsində qonaqların futbolçusu Junior Martins ikinci sarı vərəqə alaraq meydançadan kənarlaşdırıldığı üçün 1 oyun cəzalanıb, klub 200 manat cərimə olunub.
Əvəzedici heyətlərinin XXVIII turunun "Qəbələ" – "İnter" matçında meydan sahiblərinin 4 futbolçusu sarı vərəqə ilə cəzalandığı üçün klub 500 manat cərimələnib. "Rəvan" – "Neftçi" matçında "ağ-qaralar"ın futbolçusu Akşin Qurbanlı ikinci sarı vərəqə alaraq meydandan kənarlaşdırıldığı üçün 1 oyun cəzalanıb, klub 100 manat cərimə olunub.
I Divizionun XX turunun "Mil-Muğan" – "Şahdağ" matçında qonaqların klubunun 4 futbolçusu, "Şərurspor" – "Turan Tovuz" matçında meydan sahiblərinin 5 futbolçusu sarı vərəqə ilə cəzalandığı üçün hər iki klub 100 manat cərimələnib.
"Bakılı" – MOİK matçının 77-ci dəqiqəsində "Bakılı” klubunun 17 №-li futbolçusu Rasim Daşdəmirov kobud oyuna görə birbaşa qırmızı vərəqə alaraq meydandan kənarlaşdırıldığı üçün 2 oyun cəzalanır, klub 200 manat cərimə olunub.
