"Bu oyunadək və oyun zamanı burada azarkeşlərin xoş aurasını hiss etmişdim. Onlar bizi necə də dəstəkləyirdilər. Onlar üçün belə qələbəni əldə etməyi çox istəyirik. Komandamdan meydana qələbə qazanaraq, onları sevindirməyin gərəkliyini bildirdim. Tərəfdarlarımızı öpürəm". Sportnet.az-ın məlumatına görə, bunu "Qəbələ"nin baş məşqçisi Roman Qriqorçuk Fransa "Lill"ini 1:0 hesabı ilə yenərək, Avropa Liqasında "pley-off"a yüksəldikləri III təsnifat mərhələsinin cavab görüşündən sonra deyib.
Ukraynalı mütəxəssis bildirib ki, bu qələbəni heç vaxt unutmayacaq: "Bu qələbə ömrüm boyu xatirimdə qalacaq. Komandama sadəcə, xoş sözlər demək istəyirəm. Həyatda belə hadisələr, oyunlar var ki, daim yadda qalır. Bu nailiyyət Azərbaycan futbolunun nüfuzunu qaldıracaq. Həm qələbəyə, həm böyük beşlik komandasına qalib gəldiyimiz üçün sevinirik. Stadiona toplaşan azarkeşlər üçün meydanı qalib tərk etmək istəyirdim. Həm də bu qələbə Cavid Hüseynova həsr olunur. İstənilən halda bu qələbəni unutmayacam. Hər mərhələinin öz uğuru var. "Çernomorets"lə qrupdan çıxmışdıq. Onun özünə məxsus sevinci var, bu qələbənin özünəməxsus..."
Ukraynalı mütəxəssis fikirlərinə belə davam edib: "Heç kimi incitmək, xətrinə dəymək istəmirəm. Amma demək istəyirəm ki, limit məsələsi mənasızdır. Düşünmürəm ki, bu limit nəyəsə kömək etsin. Limitin aradan qalxması futbol üçün xeyirli olar. Həftəsonu ölkə çempionatı başlayır. "Kəpəz"lə qarşılaşacağıq. Ancaq bu oyunun təxirə salınmasından söhbət gedə bilməz. Təqvimdən qaça bilmərik. Elə bil rejimə öyrənmişəm ki, saat 4-dən tez yata bilmirəm. Qələbəyə görə müsbət stress var və yenə də yata bilməyəcəm. Ehtiyyat oyunçulardan istifadə etməməyimə səbəb buna ehtiyacın olmaması idi. Çünki mexanizm işləyirdi. Sadəcə Ozobiç məcburi əvəzləndi. Oyun zamanı baş hakimlə mübahisəm oldu. Hakimlər oyunu yaxşı idarə etdi. Bundan öncəki hakimlər daha zəif idi".
Qeyd edək ki, oyun "Qəbələ"nin 1:0 hesablı qələbəsi ilə yekunlaşıb. Səfərdə 1:1 hesabı qeydə alındığından Azərbaycan təmsilçisi pley-off mərhələsinə vəsiqə qazanıb.
