Bakı Olimpiya Stadionunun süni örtüklü meydançasında həvəskar komandalar arasında Mini Futbol Liqasının (MFL-in) təşkil etdiyi "San-Marino Kuboku”nun final matçı keçirilib. Sportnet.az-ın məlumatına görə, həlledici oyunda "Yuventus Baku” "AzFar”la qarşılaşıb. Finalda topa ilk zərbəni millimizin üzvləri - "Zirə"nin futbolçuları Anar Nəzirovla Elvin Məmmədov ediblər.
Maraqlı mübarizə şəraitində keçən matçda sevinən tərəf Azərbaycanın "Qoca Sinyora”sı olub. İlk hissədə 2 qol vuran "Yuventus" fasilədən sonra qapısında 1 top görsə də, qələbə hesabını qoruya bilib.
Matçdan sonra qaliblərin, ən yaxşı nominasiyalarda fərqlənənlərin mükafatlandırılma mərasimi keçirilib. Mərasimdə təşkilatçılarla yanaşı, AFFA-nın baş katibi Elxan Məmmədov, millimizin və "İnter"in hücumçusu Rauf Əliyev iştirak ediblər.
Qeyd edək ki, turnirin qalibi milli komandamızın dünya çempionatının ilk seçmə oyununu - San Marino yığması ilə səfər matçını stadiondan izləmək şansı əldə edib.
