AFFA-nın "İnter" klubuna səlahiyyətli nümayəndə təyin etdiyi Rəmiş Malıyev Azərbaycan Premyer Liqasının XVI turunda "Sumqayıt"la 2:2 hesabı ilə nəticələnən səfər oyunundan sonra müsahibə verib. Sportnet.az-ın məlumatına görə, assosiasiyanın Hüquq və Kadr şöbəsinin müdiri vəzifəsində də çalışan Malıyev jurnalistlərin suallarını cavablandırıb.
- İlk olaraq matç haqda fikirlərinizi bildirərdiniz...
- "İnter" yaxşı təsir bağışladı. Düzü, ilk dəfədir komandanın oyununu belə ürəkdən izləyirdim. O həyəcanı yaşayırdım, emosiyalar qalxır-düşürdü. Gördüyünüz kimi, futbol sonadək oynanılan oyundur. Təəssüf ki, son dəqiqələrdə buraxdığımız qolla qələbəni əldən verdik. Bilmirəm ki, futbolumuzda müşahidə olunan bu hal nə ilə bağlıdır. Hamı bilir ki, son dəqiqələrdə topu saxlamaq lazımdır. Bəlkə də ədalət zəfər çaldı ki, rəqib 2-ci qolu vuraraq hesabı bərabərləşdirdi. Ancaq hesab edirəm ki, "İnter" çox güclü komandadır. Futbolçuların hamısına minnətdaram. Onlarla görüşdüm. "İnter" ötən ildən böhran vəziyyətini yaşayır. Buna baxmayaraq, komanda stabil oyununu qoruyub saxlaya bilir. Buna görə futbolçulara təşəkkürümü bildirirəm. Bunu hər kəs bacarmaz. Hesab edirəm ki, bu gün yaxşı oyun oldu. Nəticəyə gəlincə, futboldur da.
- Belə yaxşı komandanın dağılması ədalətsizlik, mənfi hal olmazmı?
- Mən futbolçulara dedim ki, komandanı müəyyən mənada özləri də xilas edə bilərlər. Bizim də üzərimizdə müəyyən məsuliyyət olsa da, onlarda da var. Yaxşı oyun göstərsələr, yaxşı nəticələri olsa, bizim sponsor axtarışımızda arqumentlərimiz daha çox ola bilər. Ancaq özünüz də bilirsiniz ki, indiki dövrdə vəziyyət çox çətindir və heç kim tam təminat vermir. Bizim bu proseslərə qatılmağımız könüllü olmayıb. Tam obyektiv olaraq deyə bilərəm ki, "İnter" futbolumuzda yeganə stabil komandadır. Biz də çalışacağıq ki, onu qoruyaq. Düzgün olmazdı ki, belə komanda çempionatda iştirak etməsin və ya bu səviyyədən aşağı düşsün. Biz əlimizdən gələni edəcəyik ki, "İnter"i yaşadaq. Ancaq futbolçulara da demişəm ki, onlardan çox şey asılıdır.
- Bu qısa müddətdə klubun idarəetməsini tam ələ ala bilmisinizmi?
- Mən bu həftənin ikinci gününün sonundan "İnter" klubundayam. Ümumi vəziyyətlə bağlı məlumatım var. Əvvəldən də informasiyalarım vardı. Biz bura nəyisə dəyişməyə gəlməmişik. Sadəcə, ona çalışırıq ki, komandanı mövsümün sonunadək bu səviyyədə aparaq. Gələcəkdə bizə və ya başqa strukturlara tapşırlarsa, problemləri indidən ortaya çıxaracağıq. Kimlər idarəetmədə iştirak edəcəksə, bu və ya digərlərinə bildirəcəyik. "İnter"də heç bir dəyişiklik və ya yerdəyişmə planlaşdırılmır.
- "İnter"ə yeni sponsor tapılsa, özünüz qalmağı düşünürsünüz, yoxsa bu vəzifəyə müvəqqəti gələrək AFFA-dakı işinizə qayıtmaq fikrindəsiniz?
- Düzü, indi bu barədə düşünmürəm. Mənim özümdə də müəyyən idman marağı yaranıb. Əsas qarşımda duran məqsəd komandanın cari çempionatda ən azı 3-cü yeri tutmasıdır. "İnter" ilk yerlərdə gedənlərlə başabaş oynayan, heç də geri qalmayan komandadır. Avropa Liqasına vəsiqə qazanmağımız qarşımda duran əsas məqsəddir.
- Klub Avropa Liqasına vəsiqə qazansa, ancaq sponlor tapılmasa, taleyi necə olacaq? AFFA digər klublar kimi "İnter"ə maliyyə yardımı ayıracaq, yoxsa?
- Bu barədə bir söz deyə bilmərəm. Biz əlimizdən gələni edəcəyik ki, "İnter" tarixin yaddaşına köçməsin.
- Növbəti turda "Neftçi" ilə oynayacasqınız. Rəqibiniz son matçlarda hakim qalmaqalları ilə üzləşib və çətin sınaq olacaq. Nə gözləyirsiniz? Ehtimal var ki, hakimlər Qəbələdəki matçda "Neftçi"yə qarşı etdikləri səhvləri "İnter"lə oyunda sığortalasın...
- Hakimlik haqda danışmaq istəmirəm. Mütəxəssis deyiləm, danışmağım düzgün olmazdı. Ancaq istəmirəm ki, əvəz-əvəz prinsipi də olsun. Hakimlərə mütəxəssislər qiymət verəcəklər.
- "İnter"in geniş heyəti - təxminən 170 nəfər işçisi var. İxtisarlar gözlənilir?
- Biz heç kimi klubdan çıxarmayacağıq. Hamı yerində qalacaq. Təbii ki, işin gedişində müəyyən məsələlərdə optimallaşıdrma aparacağıq.
