"Ayazın hərəkətində ölçü götürüləsi bir şey yoxdur. Lakin bu cür kobud səhv etmək heç bir futbolçuya yaraşmaz. Bunun adı özünü itirməkdir. Peşəkar komandada gələcəyini düşünən oyunçunun bu cür nöqsana yol verməsi onun özü üçün bağışlanmaz haldır. Lakin buna görə onu komandadan qovmaq fikrində deyilik”. Bunu Sportnet.az-a açıqlamasında "Sumqayıt”ın baş məşqçisi Samir Abasov komandanın yarımmüdafiəçisi Ayaz Mehdiyevin Azərbaycan Premyer Liqasının XXVI turunda penaltiyə səbəb olmasına münasibət bildirərkən deyib.
O, bildirib ki, matçın 90+3-cü dəqiqəsində "Zirə”nin hesabı bərabərləşdirməsinə şərait yaradan futbolçunu komandadan göndərilməsi istisna deyil. Lakin bu, həmin səhvə görə olmayacaq: "Komandada kimin qalıb-qalmayacağı bəlli deyil. Ayaz Mehdiyev komandadan göndəriləcəksə, deməli, bizim tələblərimizə cavab vermədiyi üçün yola salınacaq. Yəni, sırf bu səhvə görə yox. "Sumqayıt”dan göndəriləsi təkcə Ayaz deyil. Komandanı tərk əlavə tərk edənlər də olacaq, gələnlər də. Bu, normal bir prosesdir”.
Qeyd edək ki, "Sumqayıt” 1:1 hesabı ilə yekunlaşan matçın 82-ci dəqiqəsində Mirabdulla Ababsovun qolu ilə hesabı açsa da, "Zirə”nin heyətində Milan Duriç penaltindən yekun nəticəni müəyyənləşdirib. Samir Abasovun rəhbərlik etdiyi kollektiv bu oyunda qalib gələcəyi təqdirdə Avropa Liqasına vəsiqə verən 4-cü pilləyə yüksələcəkdi.
