"Qarabağ"ın Çempionlar Liqasının qrup mərhələsindəki bütün rəqibləri öz ölkələrinin çempionatlarındakı qarşılaşmaları qələbə ilə başa vurublar.
Sportnet.az-ın məlumatına görə, Bakıda xal itirən "Atletiko" İspaniya La Liqasının IX turunda səfərdə "Selta"nı minimal hesabla yenib - 1:0. Qolu 28-ci dəqiqədə Kevin Qameyro vurub. Dieqo Simeonenin baş məşqçi olduğu komanda hazırda 19 xalla 4-cüdür.
"Roma" da səfərdə "Torino"ya eyni hesabla qalib gəlib. Qolun müəllifi 69-cu dəqiqədə Aleksandar Kolarov olub. Hazırda paytaxt komandası A Seriyasında 9 oyundan 18 xalla 5-ci yeri tutur.
"Çelsi" isə evdə "Uotford"u yenib - 4:2. Meydan sahiblərinin qollarını Pedro (dəq.12), Mişi Batşuayi (dəq.71; 90+5) və Sesar Aspilikueta (dəq.87) vurub. 9 turdan sonra "Çelsi" 16 xalla 4-cü yerdə gedir.
Qeyd edək ki, Azərbaycan Premyer Liqasının IX turunda "Qəbələ"yə uduzmasına baxmayaraq, "Qarabağ" 19 xalla liderliyini qoruyub.
