Noyabrın 30-da Çempionlar Liqasının (ÇL) qrup mərhələsinin VI turunda "Qarabağ”ı qəbul edəcək İtaliya "Roma”sı xoş xəbər alıb. Sportnet.az-ın forzaroma.info saytına istinadən xəbər verir ki, komandanın iki zədəli futbolçusu ümumi qrupda məşqlərə başlayıb.
Bunlar yarımmüdafiəçi Alessandro Florentsi və Patrik Şikdir. Hər iki futbolçunun noyabrın 26-da İtaliya A Seriyasının XIV turunda "Cenoa” ilə səfər matçında meydana çıxmağa hazır olduqları bildirilir.
Qeyd edək ki, Alessandro Florentsi noyabrın 18-də A seriyasının XIII turunda "Latsio” ilə görüşdə dizindən zədə alıb və ÇL-in V turunda İspaniya "Atletiko”su ilə səfər matçını buraxıb. P.Şikin isə sentyabrın 16-da ölkə çempionatının IV turunda "Verona”ya qarşı debüt oyununda sol bud əzələsi ciddi xəsarət alıb. Bu səbəbdən çexiyalı forvard sentyabrın 27-də ÇL-in II turunda "Qarabağ”la səfər oyununu buraxıb. O, həmçinin Çexiya yığmasının oktyabrın 5-də Bakıda Azərbaycan millisinə qarşı keçirəcəyi 2018-ci il dünya çempionatının seçmə qrup matçında da iştirak edə bilməyib.
