Futbol üzrə Azərbaycan Premyer Liqasında XIII tura start verilib.
Sportnet.az-ın məlumatına görə, turun açılış oyunu Gəncə şəhər stadionunda "Kəpəz" və "Qəbələ" komandaları arasında keçirilib. Oyun qonaq komandanın böyük hesablı qələbəsi ilə yekunlaşıb - 6:1. Meydan sahiblərinin yeganə topunu əvvəlki baş məşqçi Şahin Diniyevin oğlu Kərim Diniyev penaltidən vurub. "Qəbələ"dən isə Baqali Dabo və Famussa Kone "dubl" edib, daha 2 qolun müəllifi isə Stiven Jozef-Monroz və Ruslan Qurbanov vurub.
Bununla da "Kəpəz" yeni baş məşqçi Yunis Hüseynovun rəhbərliyi altında debüt matçında ağır məğlubiyyət alıb. Halbuki, Gəncə komandası mövsümdə ilk qələbəsini məhz birinci dövrədə səfərdə "Qəbələ" üzərində qazanmışdı - 2:0. Roman Qriqorçukun baş məşqçi olduğu komanda 3 oyundan sonra "Kəpəz"i yenməyə müvəffəq olub.
Günün ikinci matçında "Neftçi” "Keşlə”ni qəbul edib. "Bakcell Arena"da baş tutan görüşdə hesabı meydan sahibləri açıb. Qarşılaşmanın 33-cü dəqiqəsində Mirabdulla Abbasov fərqlənib. 51-ci dəqiqədə İqnasio Herrera "ağ-qaralar"ın üstünlüyünü artırıb. Lakin 69-cu dəqiqədə Adrian Skarlatake hesabı minimuma endirib. Buna baxmayaraq, matçda son nöqtəni meydan sahibləri qoyublar. Kapitan Ruslan Abışov 89-cu dəqiqədə yekun hesabı müəyyənləşdirib - 3:1.
Bu qələbə sayəsində xallarını 16-ya çatdıran "Neftçi"i top fərqinə görə "Sumqayıt"ı qabaqlayaraq 4-cü pilləyə yüksəlib. "Keşlə" isə 8 xalla 7-ci sırada qalıb.
Qeyd edək ki, XIII tura noyabrın 26-da keçiriləcək "Sumqayıt” – "Səbail” və "Zirə” – "Qarabağ” oyunları ilə yekun vurulacaq.
Azərbaycan Premyer Liqası
XIII tur
25 noyabr (şənbə)
14:30. "Kəpəz” – "Qəbələ” 1:6
Qollar: Kərim Diniyev, 56-penalti ilə - Baqali Dabo, 1. 54 Stiven Jozef-Monroz, 14 Famussa Kone, 40. 78 Ruslan Qurbanov, 65.
Hakimlər: Ömər Paşayev, Namiq Hüseynov, Vüsal Qənbərov, Ziya Nəsirov
AFFA nümayəndəsi: Vaqif Davudov
Hakim-inspektor: Rövşən Əhmədov
Gəncə şəhər stadionu
17:00. "Neftçi” – "Keşlə” - 3:1
Qollar: Mirabdulla Abbasov, 34. İqnasio Herrera, 51. Ruslan Abışov, 89 - Adrian Skarlatake, 69
Hakimlər: Rauf Cabbarov, Knyaz Əmiraslanov, Yaşar Abbasov, Ramil Diniyev
AFFA nümayəndəsi: Abas Hüseynov
Hakim-inspektor: Asim Xudiyev
Bakı. "Bakcell Arena”.
