Bu gün İntizam Komitəsinin iclası keçirilib. Sportnet.az-ın PFL-in rəsmi saytına istinadən məlumatına görə, Azərbaycan Kubokunun finalında keçirilən "Qəbələ” – "Neftçi” matçındakı hadisələrlə bağlı qərarlar qəbul olunub.
Bu qarşılaşmada hərəyə 4 futbolçusunun sarı vərəqə ilə cəzalanması səbəbindən klublar 1000 manat cərimə olunub. 90-cı dəqiqədə "Neftçi”nin məşqçisi Bəxtiyar Musayev texniki zona qaydalarını pozduğuna görə meydandan kənarlaşdırıldığı üçün 1 oyunluq cəzalanıb, klubu 1000 manat cərimələnib.
104-cü dəqiqədə isə "Qəbələ”nin azarkeşləri tərəfindən meydana kənar əşya (yanar fişəng) atıldığı üçün klub 2000 manat ziyana düşüb.
