Türkiyənin I Liqa klubu "Samsunspor”un futbolçusu Ufuk Budak Azərbaycan milli komandasının mart toplanışında iştirak edə bilməyəcək.
Sportnet.az Türkiyə KİV-ə istinadən xəbər verir ki, XXVII turda səfərdə "Qaziantepspor”a 1:2 hesabı ilə uduzduqları görüşdə qasıq nahiyyəsində problem yaranan 28 yaşlı sol cinah müdafiəçisi yığmanın düşərgəsinə gələ bilməyəcəyi üçün üzrxahlıq edib.
Onun zədə üzündən martın 18-də "Boluspor”la səfər matçında da iştirak etməyəcəyi bildirilir. Budakın aprelin 1-də XXIX turda "Adanaspor”la səfər oyununda oynaya biləcəyi ehtimal edilir.
Qeyd edək ki, daha əvvəl Türkiyə mətbuatı Qurban Qurbanovun Ufuk Budakı martın 23-də Belarus, 4 gün sonra isə Makedoniya yığmaları ilə keçiriləcək yoldaşlıq oyunları üçün milliyə dəvət etdiyini yazıb. Martın 7-də isə Sportnet.az Türkiyə Futbol Federasiyasının rəsmi saytında Budakın Türkiyə vətəndaşı kimi qeydiyyata düşdüyünü üzə çıxararaq, onun Azərbaycan yığmasına dəvət almasının qeyri-mümkünlüyünü yazıb.
