Azərbaycan milli komandasının Belarus və Makedoniya yığmaları ilə yoldaşlıq görüşləri üçün heyəti bu gün açıqlanacaq.
Sportnet.az-ın məlumatına görə, bu barədə millinin baş məşqçisi Qurban Qurbanov bildirib. O deyib ki, "Sumqayıt" və "Kəpəz" arasında hazırda davam edən Topaz Premyer Liqasının XX tur matçından sonra dəvətlilərin tam siyahısını müəyyənləşdirəcək. Qurbanov yığmada yeni futbolçuların olacağını diqqətə çatdırıb: "Sumqayıt” - "Kəpəz” oyunundan sonra heyəti tam müəyyənləşdirəcəyəm. Bu oyuna canlı baxa bilməsəm də, evdə izləyib, son qərarı verəcəyəm. Bəzi dəyişikliklər edəcəyəm. Millidə yeni futbolçular olacaq".
Baş məşqçi Ufuk Budakın milliyə dəvət olunduğunu, lakin zədə aldığından komandaya kömək edə bilməyəcəyini də vurğulayıb.
Qeyd edək ki, Belarusla görüş martın 23-də Bakı Olimpiya Stadionunda, Makedoniya ilə qarşılaşma isə martın 27-də Türkiyənin Antalya bölgəsindəki "Mardan" stadionunda olacaq. Hər iki oyun Bakı vaxtı ilə saat 20:00-da başlanacaq.
