Almaniyanın "Ayntraxt" komandasının baş məşqçisi Niko Kovaç cari mövsüm yekunlaşdıqdan sonra "Bavariya"nın sükanı arxasına keçəcək.
Sportnet.az-ın "Bild"ə istinadən məlumatına görə, Münhen klubunun rəhbərliyi xorvatiyalı mütəxəssisin namizədliyi üzərində dayanmağa dair yekun qərar qəbul edib.
"Bavariya" onu Dortmund "Borussiya"sının sabiq baş məşqçisi Tomas Tuxeli dəvət etmək cəhdinin uğursuzluğa düçar olmasından sonra hədəfə alıb. Kovaç "Bavariya"nın idman direktoru Həsən Salihamiciçlə yaxşı tanışdır. Onlar 2001 - 2003-cü illərdə birgə çıxış ediblər. Digər tərəfdən, 47 yaşlı mütəxəssisin müqaviləsində belə bir bənd var ki, Münhen klubundan təklif gələcəyi təqdirdə, o, "Ayntraxt"ı tərk edə bilər.
Qeyd edək ki, hazırkı baş məşqçisi Yupp Haynkes mövsümün sonunda Almaniyanın ən titullu klubu ilə yollarını ayıracaq. "Aytraxt"ın 19 yaşadək futbolçulardan ibarət komandasında Azərbaycan millisinin hücumçusu Renat Dadaşov da çıxış edirdi. Lakin intizamsızlığı səbəbindən Dadaşov heyətdən kənarlaşdırılıb və ona özünə yeni klub tapması tapşırılıb.
