"Qarabağ"ın Çempionlar Liqasının II təsnifat mərhələsində rəqibi Albaniya "Kukesi"sinin oyunçusu Simo Rumbulaku klub televiziyasına müsahibə verib.
Sportnet.az xəbər verir ki, 27 yaşlı müdafiəçi Bakıya səfərin yorucu olduğunu söyləyib: "Səfər yorucu olsa da, biz çox yaxşı oteldə məşkunlaşmışıq. Burada iqlim də yaxşıdır. Sabahkı oyuna hazırlaşmalıyıq. "Qarabağ"a qarşı ilk matçda gördük ki, bu komanda ilə böyük fərqimiz yoxdur. Əlbəttə, burada keyfiyyətli oyunçular və professional səviyyədə komanda var. Biz isə əlimizdən gələni etməyə çalışacağıq. Qol buraxmamaq önəmlidir. Mənim fikrimcə qol vurmaq üçün də şansımız olacaq. "Valetta" ilə oyunda olduğu kimi diqqətli olmalıyıq. Hədəfə çatacağımıza inanıram".
Rumbulaku "Qarabağ"ın Albaniyalı futbolçusu Ansi Aqolli barədə də danışıb: "İlk oyunda Albaniya milli komandasının kapitanı Ansi Aqolli ilə qarşı-qarşıya gəldim. Ona uğurlar arzulayıram".
Qeyd edək ki, avqustun 1-i Tofiq Bəhramov adına Respublika stadionunda keçiriləcək "Qarabağ" - "Kukesi" matçı Bakı vaxtı ilə saat 21:00-da başlanacaq. Bu komandalar arasındakı ilk oyun qolsuz bərabərliklə başa çatıb.
