Futbol üzrə Azərbaycan Kubokunda 1/4 final mərhələsinin daha bir ilk oyunu keçirilib.
Sportnet.az xəbər verir ki, günün ikinci matçında "Neftçi" "Bakcell Arena"da "Sumqayıt"ı qəbul edib. Görüş qonaqların 2:0 hesablı qələbəsi ilə başa çatıb. Əli Babayev 28-ci dəqiqədə penaltidən fərqlənib. Şəhriyar Əliyev isə 45+4-cü dəqiqədə künc zərbəsindən sonra başla qol vurub.
Maraqlıdır ki, hər iki qolun müəllifi zədələnərək oyunu davam etdirə bilməyib. Matçın ilk hissəsində ayağında zərbə alan Ə.Babayev fasilədən sonra, 55-ci dəqiqədə Cavid Tağıyevlə əvəzlənib. Qarşılaşmanın 62-ci dəqiqəsində zədələnən Şəhriyar Əliyev isə yerini Murad Xaçayevə verib.
Oyunun 88-ci dəqiqəsində "Neftçi"nin heyətində Anton Krivotsyuq simulyasiya etdiyi üçün ikinci dəfə sarı vərəqə alıb və meydandan qovulub.
Qeyd edək ki, bu komandalar arasında cavab oyunu dekabrın 19-da "Kapital Bank Arena”da keçiriləcək və saat 19:00-da başlayacaq.
_______
Azərbaycan Kubokunda 1/4 final mərhələsinə start verilib.
Sportnet.az xəbər verir ki, ilk oyunda "Zirə" və "Səbail" komandaları üz-üzə gəlib. "Dalğa Arena"da keçirilmiş görüş "Zirə"nin qələbəsi ilə yekunlaşıb. Yeganə qolu 45-ci dəqiqədə İlkin Muradov vurub. Bu, "Səbail"in legioneri Tome Kitanovskinin 33-cü dəqiqədə qırmızı vərəqə almasından sonra baş verib.
Günün növbəti oyunu "Neftçi" və "Sumqayıt" arasında keçiriləcək.
-----
Bu gün futbol üzrə Azərbaycan Kubokunda 1/4 final mərhələsinə start veriləcək.
Sportnet.az xəbər verir ki, bu raund iki görüşdən ibarət olacaq. 1/4 finalın oyunları iki günü əhatə edəcək. İlk oyun günündə "Zirə" - Səbail" və "Neftçi" -"Sumqayıt" qarşılaşmaları baş tutacaq.
Açılış matçında "Zirə" "Səbail"i qəbul edəcək. Qonaqlar 1/8 finalda I Dizion təmsilçisi "Kəpəz"i 4:0 hesabı ilə məğlub edərək növbəti mərhələyə yüksəlib. "Zirə" isə mübarizəyə 1/4 finalda başlayacaq. İndiyədək ölkə kubokunda qarşılaşmayan komandalar cari mövsüm Premyer Liqada iki dəfə üz-üzə gəliblər. İlk dövrəsindəki oyun 1:1 hesabı ilə başa çatsa da, sonradan "Zirə"yə texniki məğlubiyyət verilib. İkinci dövrədəki qarşılaşma qolsuz bərabərliklə yekunlaşıb.
Günün ikinci görüşündə çempionatın lideri "Neftçi" "Sumqayıt"ın müqavimətini qırmağa çalışacaq. Matç komandaların ölkə kuboku tarixində ilk dueli olacaq. "Gənclik şəhəri" təmsilçisi 1/8 finalda "Qaradağ Lökbatan"ı 4:0 hesabı ilə məğlub edərək mübarizədən kənarlaşdırıb. "Neftçi" isə ölkə kubokuna hazırkı mərhələdən başlayacaq. Flaqman çempionatın birinci dövrəsində rəqibini 2:0 hesabı ilə üstələyib. İkinci dövrənin son turuna təsadüf edən son matç isə qolsuz bərabərliklə yekunlaşıb.
Bu gün keçiriləcək iki oyunun cavab qarşılaşmaları dekabrın 19-da təşkil olunacaq.
Qeyd edək ki, 1/4 finalın digər iki matçı sabah keçiriləcək. "Qəbələ" "Sabah"ı "Qarabağ" isə "Keşlə"ni qəbul edəcək.
Azərbaycan Kuboku, 1/4 final mərhələsi
İlk oyunlar
15 dekabr (şənbə)
17:00. "Zirə” – "Səbail” - 1:0
Qol: İlkin Muradov, 45
Qırmızı vərəqə: Tome Kitanovski, 33 ("Səbail")
Hakimlər: Alik Yunusov, Mübariz Haşımov, Rahil Ramazanov, Kamal Umudlu
Hakim-inspektor: Fizuli Nəcəfov
AFFA nümayəndəsi: Əsgər Əmirəliyev
"Dalğa Arena”,
19:00. "Neftçi” – "Sumqayıt” - 0:2
Qollar: Əli Babayev, 28 (pen.); Şəhriyar Əliyev, 45+5
Qırmızı vərəqə: Anton Krivotsyuk, 88 ("Neftçi")
Hakimlər: Əliyar Ağayev, Rza Məmmədov, Akif Əmirəli, Səbuhi Bayramov
Hakim-inspektor: Asim Xudiyev
AFFA nümayəndəsi: Seymur Səlimli
"Bakcell Arena”
