Futzal üzrə Azərbaycan Kubokunda 1/16 final mərhələsinin 4 oyunu keçirilib.
Sportnet.az-ın məlumatına görə, ilk görüşdə “Advokat” böyükhesablı qələbə qazanıb. “Füzuli” fasiləyə qədər qapısını toxunulmaz saxlasa da, ikinci hissədə rəqibin ardıcıl qollar vurmasına mane ola bilməyib.
İkinci oyun daha gərgin keçib. “Borçalı” 18-ci saniyədə hesabı açıb. Ancaq ruhdan düşməyən “Green Log” fasiləyə 2 dəqiqə qalmış ardıcıl iki qol vurmaqla üstünlük qazanıb. “Yaşıllar” üstünlüyünü ikinci hissədə də davam etdirib və nəticədə mərhələ adlayan tərəf olub.
Günün, bəlkə də mərhələnin ən maraqlı oyunu ADBTİA – “Standard” dueli olub. Hər iki komandanın Birinci Liqanın ilk “3-lüy”ündə yer alması oyuna marağı bir qədər də artırıb. “İdmançılar” artıq 2-ci dəqiqədə rəqib torunu 2 dəfə silkələməyi bacarıb. Lakin bu qollar fasiləyə kimin üstün yollanacağına aydınlıq gətirməyib. Fasiləyə qədər 6 qolun vurulduğu matçın ikinci hissəsində qapılara daha 4 dəfə yol tapılıb ki, onda da “Standard” cütün taleyini həll edib.
Günün son oyunu da gərginliyi ilə yadda qalıb. Əslində “Atletiko Baku” kimi iddialı komandanı mübarizədən kənarlaşdıran “Xəzər Astara” favorit hesab edilsə də, “Təbriz” təcrübəsi hesabına qalibin kimliyinə aydınlıq gətirib. Beləliklə, ilk oyun gününün yekununda “Advokat”, “Green Log”, “Standard” və “Təbriz” 1/8 finala yüksəlib.
Azərbaycan Kuboku, 1/16 final
“Füzuli” - “Advokat” - 0:6
Qollar: R. Həsənov, 18:10, S. Davidov, 19:12, R. İsgəndərov, 23:19, C. Əhmədov, 25:07, C. Şirinli, 27:35, N. Əsədov, 29:27
“Green Log” – “Borçalı” - 4:1
Qollar: S. Namazov, 13:09, F. Həsənov, 13:47, R. Nağıyev, 17:23, T. Məmmədov, 25:19 - A. Qasımov, 0:18
ADBTİA - “Standard” - 4:6
Qollar: M. Quluzadə, 0:37, 01:40, R. Həsənzadə, 13:58 (ö/q), E. Cəbrayılov, 24:58 - H. Amanov, 02:42, 11:37, T. Ağayev, 08:12, 25:44 , A. Həsənov, 23:22, Seyidrəzi Ağayev, 25:05
“Xəzər Astara” - “Təbriz” - 2:4
Qollar: E. Əlizadə, 09:40, Ə. Hümbətov, 18:42 - İ. Qazıyev, 04:40, 16:37, C. Cəfərov, 19:32, 22:52
