AZAL PFK-da rəhbərlik və əsas komandanın üzvləri arasında növbəti görüş keçirilib. Sportnet.az-ın klubun rəsmi "Facebook" səhifəsinə istinadən məlumatına görə, burada əsas müzakirə mövzusu komandanın Premyer Liqanın son turunda "Bakı"ya məğlubiyyəti (0:1) olub.
Klubun vitse-prezidenti Fikrət Hüseynov açılış nitqi ilə çıxış edərək bu nəticənin arzuolunmaz olduğunu bildirib. Futbolçuların ən qısa zamanda toparlanmalı olduğunu qeyd edən Hüseynov rəhbərliyin komandanın qarşısına qoyduğu konkret tələbi də açıqlayıb: qarşıdakı 2 oyunda (29 oktyabr "Simurq" və 2 noyabr "Neftçi") yalnız və yalnız qələbə qazanmaq!
Daha sonra komandanın baş məşqçisi Tərlan Əhmədov söz alaraq, komandadaxili durumdan və əhval-ruhiyyədən danışıb. O, növbəti oyunlarda bu uğursuzluğu unutduracaqlarına inandığını bildirib. Futbolçuların əhval-ruhiyyəsinin yüksəldilməsi məqsədilə keçirilən görüşdə komandanın müşahidə şurasının sədri Rəsul Rəsulov da iştirak edib.
Qeyd edək ki, bir neçə dəqiqə əvvəl ilk dəfə məhz Sportnet.az AZAL-da iclas keçirildiyini və məşqçilər korpusu ilə futbolçulara 2 oyunluq vaxt verildiyini qeyd etmişdi.
