Futbol üzrə Azərbaycan Premyer Liqasında XVI tura yekun vurulub.
Sportnet.az xəbər verir ki, turun son oyununda “Səbail” “Bayıl Arena”da “Zirə”ni qəbul edib. Qarşılaşma qonaqların 2:0 hesablı qələbəsi ilə yekunlaşıb.
“Zirə”nin heyətində ilk qolu Xulio Sezar Rodrigez vurub. Paraqvaylı hücumçu ikinci dəqiqədə fərqlənib. Sadio Tounkara isə 90+4-cü dəqiqədə fərqlənməklə oyunda son nöqtəni qoyub.
Amma "Səbail"in qol vurmaq üçün də kifayət qədər imkanı olub. 51-ci dəqiqədə “Səbail”in hücumçusu Ağabala Ramazanovun qüvvətli zərbəsi qapı tirindən geri qayıdıb. 68-ci dəqiqədə Rahid Əmirquliyev uzaqdan fərqlənməyə çalışsa da, hücum heç bir nəticə verməyib. 69-cu dəqiqədə “Səbail”in digər oyunçusu Tome Kitanovskinin də başla vurduğu top qapı dirəyinə tuş gəlib.
81-ci dəqiqədə isə Elvin Yunuszadə ikinci sarı vərəqəni alaraq “Səbail”i azlıqda qoyub. Bundan üç dəqiqə sonra Kevin Kubembanın da zərbəsi dirəyə dəyib. Meydan sahiblərinin növbəti hücumları da nəticəsiz qalıb.
Bu qələbədən sonra xallarının sayını 13-ə yüksəldən “Zirə” sonuncu pillədən qurtularaq 7-ci sıraya yüksəlib. “Səbail” isə 24 xalla üçüncüdür.
Qeyd edək ki, günün digər matçında “Neftçi” “Keşlə”ni 2:0 hesabı ilə məğlub edib. Dünən keçirilmiş oyunlarda isə “Qəbələ” “Sabah”ı 1:0, “Qarabağ isə “Sumqayıt” 2:0 hesabı ilə üstələyib.
----------------------------------------------------
Azərbaycan Premyer Liqasında XVI turun daha bir oyunu keçirilib.
Sportnet.az xəbər verir ki, lider "Neftçi" "Bakcell Arena"da "Keşlə"ni qəbul edib. İnqilab Məmmədovun idarə etdiyi görüş meydan sahiblərinin 2:0 hesablı qələbəsi ilə başa çatıb. Hər iki qolu flaqmanın kapitanı Emin Mahmudov vurub. 27 yaşlı yarımmüdafiəçi 33-cü dəqiqədə cinah ötürməsini başla tora göndərib.
Matçın 65-ci dəqiqəsində cərimə meydançası daxilində Baqoli Daboya qarşı qayda pozuntusu qeydə alınıb və baş hakim 11 metrlik cərimə zərbəsi təyin edib. Penalti nöqtəsinə yaxınlaşan Mahmudov qol vursa da, İnqilab Məmmədov zərbənin təkrarlanmasını istəyib. O, səbəb kimi zərbə zamanı cərimə meydançası daxilinə "Keşlə"nin futbolçularının daxil olduqlarını göstərib. "Neftçi"nin kapitanı ikinci dəfə də zərbəni düzgün yerinə yetirib və hesabı 2:0-a çatdırıb.
82-ci dəqiqədə isə meydana "Neftçi"nin yeni transferi Canluka Sansone daxil olub. Vanqelis Platellası əvəzləyən Sansone Azərbaycan Premyer Liqasında çıxış edən ilk italiyalı futbolçu kimi tarixə düşüb.
Beləliklə, inamlı qələbə sayəsində "Neftçi" xallarını 37-yə yüksəldərək, liderliyuni davam etdirib. 12 xala malik "Keşlə" isə 7-ci pillədə qərarlaşıb.
--------------------
Bu gün Azərbaycan Premyer Liqasında XVI turun daha 2 oyunu keçiriləcək.
Sportnet.az-ın məlumatına görə, əvvəlcə lider "Neftçi" "Bakcell Arena"da "Keşlə"ni qəbul edəcək. Flaqman qələbə təqdirində, ən yaxın izləyicisi "Qarabağ"la xal fərqini yenidən 3-ə yüksəldəcək. Hazırda 34 xala malik "ağ-qaralar" ötən tur səfərdə "Qarabağ"la 1:1 hesablı heç-heçə ediblər. "Keşlə" isə öz meydanında "Səbail"ə uduzub - 0:3. Tərlan Əhmədovun baş məşqçi olduğu komanda 12 xalla 7-ci pillədə qərarlaşıb.
Əhmədov üçün bu qarşılaşma prinsipial xarakter daşıyır. O, ötən mövsümün böyük bölümü ərzində rəhbərlik etdiyi və bürünc medal qazandırdığı "Neftçi"dən istefaya göndərilib. Bu mövsüm "Keşlə"yə rəhbərlik edən 48 yaşlı mütəxəssis ikinci dövrədə sabiq komandası ilə üz-üzə gəlib. Həmin matçda "ağ-qaralar" minimal hesablı qələbə qazanıblar - 1:0.
"Keşlə"nin heyətində Conatan Ayite və Davud Kərimi zədəlidir. "Neftçi"də isə Canluka Sansone məhz bu görüşdə debüt edə bilər. Bu, baş versə, Premyer Liqada ilk italiyalı futbolçu çıxış edəcək.
Ümumiyyətlə, iki komanda indiyədək 57 dəfə üz-üzə gəlib. Bunların 29-da "Neftçi", 14-də "Keşlə" qalib gəlib. Daha 14 görüş heç-heçə ilə yekunlaşıb. Topların nisbətində flaqman öndədir - 87:58. Lider son 13 görüşün hamısında qol vurub və axırıncı 12 qarşılşmada heç-heçə qeydə alınmayıb. Digər tərəfdən, “ağ-qaralar” ardıcıl 6 ev oyununda qələbə qazanıb.
Tura "Dalğa Arena"da "Səbail" - "Zirə" matçı ilə yekun vurulacaq. Hazırda 24 xalla 3-cü pillədə olan meydan sahibləri qələbə təqdirində, mövqeyini yaxşılaşdıracaqlar. Ötən gün "Qəbələ" səfərdə "Sabah"ı 1:0 hesabı ilə yendikdən sonra "Səbail"lə xal fərqini minimuma endirib. Bu səbəbdən, Aftandil Hacıyevin baş məşqçi olduğu komandaya mütləq qələbə lazımdır.
10 xalla sonuncu yerdə gedən "Zirə" isə ötən tur "Sabah"a 0:2 hesabı ilə məğlub olub. Qəsəbə təmsilçisi özündən 2 xal irəlidəki "Keşlə"ni keçmək üçün mütləq qələbə qazanmalıdır. Meydan sahiblərindən Vüqar Mustafayev ötən tur qırmızı vərəqə aldığı üçün meydana çıxmayacaq.
"Səbail" və "Zirə" çempionatda 7-ci dəfə üz-üzə gələcəklər. Əvvəlki qarşılaşmalardan 1-də "Səbail", 3-də "Zirə" qalib gəlib, daha 2 görüş heç-heçə yekunlaşıb. Topların nisbəti də "qartallar"ın xeyrinədir - 5:2. “Zirə” son 2 oyunda qələbə qazanmayıb. “Səbail”in yeganə qələbəsi ilk dövrədə texniki nəticə hesabına gerçəkləşib. Digər tərəfdən, Samir Abasovun baş məşqçi olduğu kollektiv Azərbaycan Kubokunun 1/4 finalında məhz bugünkü rəqibini üstələyib - 1:0, 3:2.
Qeyd edək ki, turun ilk oyun günündə səfərdə "Qəbələ" "Sabah"a 1:0, "Qarabağ" "Sumqayıt"a 2:0 hesabı ilə qalib gəlib.
Topaz Premyer Liqası, XVI tur
10 fevral (bazar)
14:00. “Neftçi” – “Keşlə” - 2:0
Qollar: Emin Mahmudov, 35; 68-pen.
“Bakcell Arena”, 1000 tamaşaçı
Baş hakim: İnqilab Məmmədov
Baş hakimin köməkçiləri: Rahil Ramazanov, Pərvin Talıbov
Dördüncü hakim: Rövşən Rəcəbov
Hakim-inspektor: Rövşən Əhmədov
AFFA nümayəndəsi: Məmmədəli Məmmədov
Sarı vərəqələr: Ömər Buludov, 78 (qeyri-idman hərəkəti) - Denis Silva, 7 (qeyri-idman hərəkəti); Con Kamara, 33 (qeyri-idman hərəkəti); Vüsal İsgəndərli, 37 (hakimin qərarına etiraz); Azər Salahlı, 66 (qeyri-idman hərəkəti); Tərlan Quliyev, 67 (qeyri-idman hərəkəti)
Artırılan vaxt: I hissədə - 1 dəq; II hissədə - 4 dəq.
“Neftçi”: 1. Səlahət Ağayev 18. Tural Axundov 8. Emin Mahmudov (k) 22. Mirabdulla Abbasov (7. Namiq Ələsgərov, 65) 25. Kiril Petrov 6. Qoran Paratski 93. Soni Mustivar 9. Baqali Dabo (36. Mamadu Kane, 89) 3. Mamadu Mbodj 11. Vangelis Platellas (16. Canluka Sansone, 82) 26. Ömər Buludov
Ehtiyat oyunçular: 12. Kamran İbrahimov 15. Ruslan Abışov 21. Məhəmməd Mirzəbəyov 17. Rəhman Hacıyev 77. Elvin Sərkərov 70. Əli Şirinov 95. Rəhman Daşdəmirov
Baş məşqçi: Roberto Bordin
“Keşlə”: 1. Kamran Ağayev (k) 19. Azər Salahlı 33. Tərlan Quliyev 4. Slavik Alxasov (17. Samir Məsimov, 86) 3. Denis Silva 22. Nikola Mitroviç 14. Andre Klennon 25. Con Kamara (9. Amil Yunanov, 72) 21. Luis Angelo Pena (32. Valeri Kutsenko, 46) 2. Sərtan Taşqın 11. Vüsal İsgəndərli
Ehtiyat oyunçular: 30. Davud Kərimi 18. Ruslan Əmircanov 8. Seymur Əsədov 93. Edvinas Girdvainis 65. Cabir Əmirli 66. Murad Qayalı 34. Qədir Bayramlı 95. Cavid Əliyev 90. Orxan Fərəcov
Baş məşqçi: Tərlan Əhmədov
İlk iki dövrədəki oyunlar: 2:0, 1:0
16:30. “Səbail” – “Zirə” - 0:2
Qollar: Xulio Sezar Rodrigez, 2. Sadio Tounkara, 90+5
“Bayıl Arena”, 300 tamaşaçı
Baş hakim: Əliyar Ağayev
Baş hakimin köməkçiləri: Akif Əmirəli, Rza Məmmədov
Dördüncü hakim: Nail Nağıyev
Hakim-inspektor: Asim Xudiyev
AFFA nümayəndəsi: Ramiz Mustafayev
Sarı vərəqələr: Elvin Yunuszadə, 61 (qeyri-idman hərəkəti), 81 (qeyri-idman hərəkəti); Aqşin Qurbanlı, 83 (qeyri-idman hərəkəti); Jarjue Maudo, 88 (qeyri-idman hərəkəti) - Bilal Həmdi, 68 (qeyri-idman hərəkəti); Aleksandr Dedov, 90+1 (qeyri-idman hərəkəti)
Qırmızı vərəqə: Elvin Yunuszadə, 81
Artırılan vaxt: I hissədə - yoxdur; II hissədə - 4 dəq.
“Səbail”: 1. Aleksandr Rıbka 13. Şəhriyar Rəhimov 5. Vüqar Bəybalayev 14. Rahid Əmirquliyev (k) 10. Ağabala Ramazanov 32. Elvin Yunuszadə 99. Jarjue Maudo 8. Yevgeni Koçuk 27. Emil Martinov (33. Tome Kitanovski, 62) 28. Kevin Kubemba 7. Fəhmin Muradbəyli (18. Aqşin Qurbanlı, 62)
Ehtiyat oyunçular: 25. Elxan Əhmədov 50. Fərhad Vəliyev 26. Kamal Qurbanov 88. Orxan Qurbanlı 3. Tamazi Tsetsxladze 17. Elçin Rəhimli 19. Ruslan Hacıyev
Baş məşqçi: Aftandil Hacıyev
“Zirə”: 85. Kamal Bayramov (k) 39. Sadiq Quliyev 88. Tellur Mütəllimov 26. Miloş Radivoyeviç 27. Adrian Skarlatake 11. Dilan Duventru (10. Sadio Tounkara, 72) 91. Bilal Həmdi 9. Aleksandr Dedov 18. Xulio Sezar Rodrigez (20. Fofana İsmael, 46) 38. İlkin Muradov 99. Rafael Məhərrəmli (3. Budaq Nəsirov, 77)
Ehtiyat oyunçular: 1. Orxan Sadıqlı 62. Abdulla Seyidəhmədov 8. Kamal Mirzəyev 77. Mirsahib Abbasov 23. Mfo Kqasvane 17. Robin Nqalande
Baş məşqçi: Samir Abasov
İlk iki dövrədəki oyunlar: +:-, 0:0.
