Oyun çox surətli keçdi. Belə güclü komandaya qarşı İspaniyada oynamaq bizim üçün çox böyük təcrübə oldu. Heç bir komponentdə rəqibdən geri qalmadıq".
Sportnet.az-ın məlumatına görə, bunu Azərbaycanın 19 yaşadək futbolçulardan ibarət milli komandasının baş məşqçisi Vüqar Məmməd Mursiyadakı təlim-məşq toplanışında İspaniya yığmasına 0:2 hesabı ilə uduzduqları yoxlama oyunundan sonra deyib. Gənc mütəxəssis Avropa çempionlarına qarşı layiqli futbol oynayan komandasının hər bir üzvünə təşəkkür edib.
Onun fikrincə, hazırkı oyunçularla gələcəyə ümidlə baxmaq olar: "Belə çıxış etsək, Avropa çempionatının elit-raund mərhələsində uğur qazana bilərik. Şans həmişə var. Uğur qazanmaq üçün çalışacağıq. Taktiki baxımdan daha da ağıllı futbol oynamalıyıq. Bunun üçün bu təlim-məşq toplanışından daha səmərəli istifadə etməliyik".
Qeyd edək ki, Azərbaycan millisi 20 - 26 martda Rusiyada təşkil olunacaq elit-raundda yerli komanda ilə yanaşı, İrlandiya və Rumıniya ilə birgə 1-ci qrupda mübarizə aparacaq.
