Futbol üzrə Azərbaycan Premyer Liqasında XX turun daha bir oyunu keçirilib.
Sportnet.az-ın məlumatına görə, "Qarabağ" Tofiq Bəhramov adına Respublika stadionunda "Zirə"ni qəbul edib. Görüş qolsuz yekunlaşıb. Oyun ərzində Ağdam komandası hücumda olsa da, real qol imkanları yaratmaqda çətinlik çəkib. Qəsəbə təmsilçisi isə əks-hücumlara bel bağlasa da, fərqlənə bilməyib.
Bu, iki komanda arasında 15-ci oyun olub. "Qarabağ"ı bu dəfə də yenə bilməyən "Zirə" 4-cü heç-heçə ilə kifayətlənib. Samir Abasovun baş məşqçi olduğu kollektiv həm də ağdamlılara ardıcıl 5 oyundan sonra uduzmayıb. Digər tərəfdən, "Zirə" çempionatda məğlubiyyətsiz oyunlar seriyasını 5-ə, "Qarabağ" isə 11-ə çatdırıb.
Heç-heçəyə rəğmən, Qurban Qurbanovun baş məşqçi olduğu kollektiv xallarını 42-yə çatdıraraq, ən azı bir günlük liderliyə yüksəlib. "Zirə" isə 19 xalla 7-ci pillədə qalıb.
Qeyd edək ki, günün digər oyununda "Keşlə" "Sabah"ı 3:0 hesabı ilə üstələyib. Tura sabah keçiriləcək "Qəbələ" - "Səbail" və "Sumqayıt" - "Neftçi" oyunları ilə yekun vurulacaq.
-----------------------
Futbol üzrə Azərbaycan Premyer Liqasında XX tura start verilib.
Sportnet.az xəbər verir ki, açılış matçında "Keşlə" "ASK Areana"da "Sabah"ı qəbul edib. Qarşılaşma meydan sahiblərinin 3:0 hesablı qələbəsi ilə yekunlaşıb.
Görüşdə ilk iki qolu "Keşlə"nin legioneri Conatan Ayite vurub. Fransalı hücumçu 26 və 47-ci dəqiqələrdə fərqlənib. 66-cı dəqiqədə isə Cabir Əmirli yekun hesabı müəyyənləşdirib.
Bu nəticədən sonra "Keşlə" xallarını 19-a çatdırıb və 6-cı pilləyə yüksəlib. 5-ci pillədəki "Sabah"ın isə 21 xalı var.
Qeyd edək ki, günün digər oyununda "Qarabağ" "Zirə" ilə qarşılaşacaq. Tura sabah keçiriləcək "Qəbələ" - "Səbail" və "Sumqayıt" - "Neftçi" matçları ilə yekun vurulacaq.
-----------------------------------------------------
Bu gün keçiriləcək iki oyunla Azərbaycan Premyer Liqasının XX turuna start veriləcək. Sportnet.az-ın məlumatına görə, hər iki qarşılaşma Bakıda olacaq.
Əvvəlcə "ASK Arena"da "Keşlə" "Sabah"ı sınağa çəkəcək. Hazırda ölkə kubokunun son qalibi 16 xalla 7-ci, debütant isə 21 xalla 5-ci pillədə qərarlaşıb. Bu komandalar arasında ilk iki dövrənin qarşılaşmalarında qonaq tərəf qalib olub. "Sabah" bu oyunlarda meydanı qolsuz tərk etməyib.
Komandalar meydana itkilərlə çıxacaqlar. "Keşlə"dən Amil Yunanov, "Sabah"dan isə Novruz Məmmədovla Rəşad Eyubov sarı vərəqə limitini keçdikləri üçün oynamayacaq.
Bu matç baş məşqçilər Tərlan Əhmədovla Elşad Əhmədov üçün prinsipial əhəmiyyətə malikdir. Onlar vaxtilə "Neftçi"də birgə çalışıblar. Lakin E.Əhmədov məhz T.Əhmədovla aralarındakı münaqişə üzündən "ağ-qaralar"ı tərk edib.
Turun digər görüşündə "Qarabağ" "Zirə"ni qəbul edəcək. Ağdam klubu son 10 oyunda uduzmayıb və hazırda 41 xalla 2-ci pillədə yer alıb, Axırıncı 4 qarşılaşmada yenilməyən paytaxt təmsilçisi isə 18 xalla 6-cıdır. Bu, iki komanda arasında yubiley sayda - 15-ci matç olacaq. Əvvəlki oyunların heç birində "Zirə" qələbə qazana bilməyib. Üstəlik, "Qarabağ" son 5 görüşdə qalib gəlib. Ümumilikdə, "Zirə" cəmi 3 dəfə heç-heçəyə nail olub və qalan 11 qarşılaşmada uduzub. II dövrədə ağdamlılar qəsəbə təmsilçisini 6:0 hesabı ilə məğlub edib və bu, hələlik mövsümün ən böyük fərqli qələbəsi sayılır.
Komandaların heyətində ciddi itki yoxdur. Üstəlik, "Qarabağ"dan Miçel zədəsini tam bərpa edib və kollektiv məşqlərə qatılıb.
Bugünkü oyunlar komandaların turnir cədvəlindəki vəziyyətlərinə də təsir göstərə bilər. "Keşlə" qələbə qazansa, 6-cı pilləyə yüksələcək. Bu, "Zirə"nin xal itkisi təqdirində, ən azı növbəti turadək davam edəcək. "Qarabağ" isə qalib gəlsə, ən azı bir günlük liderə çevriləcək.
Azərbaycan Premyer Liqası, XX tur
9 mart (şənbə)
16:00. “Keşlə” – “Sabah” - 3:0
Qol: Conatan Ayite, 26. 47. Cabir Əmirli, 66
Hakimlər: Rəhim Həsənov, Cəmil Quliyev, Eyyub İbrahimov, Namiq Bəkirov
Hakim-inspektor: İmanxan Sultani
AFFA nümayəndəsi: Ramiz Mustafayev
“ASK Arena”
İlk 2 dövrədəki oyunlar: 0:1, 2:1
18:30. “Qarabağ” – “Zirə” - 0:0
Hakimlər: Rauf Cabarov, Nahid Əliyev, Müslüm Əliyev, Rəvan Həmzəzadə
Hakim-inspektor: Ramil Diniyev
AFFA nümayəndəsi: Elbrus Abbasov
Tofiq Bəhramov adına Respublika stadionu
İlk 2 dövrədəki oyunlar: 3:2, 6:0.
Qeyd edək ki, turun qalan 2 oyunu martın 10-da olacaq. "Qəbələ" "Səbail"i, "Sumqayıt" "Neftçi"ni qəbul edəcək.
