Azərbaycan Premyer Liqasında XX turun son oyunu keçirilib.
Sportnet.az xəbər verir ki, "Sumqayıt" "Kapital Bank Arena"da "Neftçi"ni qəbul edib. Matç qonaqların qələbəsi ilə başa çatıb - 2:1.
Hesabı 26-cı dəqidə meydan sahiblərinin hücumçusu Peyman Babayi açıb. Qonaqların heyətində Mamadu Mboc 76-cı dəqiqədə bərabərlik qolunu vurub. Bu zaman "Sumqayıt"ın qapıçısı Mehdi Cənnətov topu tordan götürərək meydanın mərkəzinə aparmaq istəyən "Neftçi"nin müdafiəçisi Kiril Petrov itələyib. Nəticədə referi Rəşad Əhmədov qolkiperə qırmızı, ukraynalı müdafiəçiyə sarı vərəqə göstərib.
84-cü dəqiqədə isə baş hakim "Sumqayıt"ın baş məşqçisi Ayxan Abbasovu etirazlara görə texniki zonadan uzaqlaşdırıb, onun köməkçisi Mehman Yunusova xəbərdarlıq edib. 87-ci dəqiqədə isə Ömər Buludov "Neftçi"nin qələbə qolunu vurub. Bununla da qonaqlar cari mövsümdə ilk dəfə məğlub duruma düşdükləri matçda geri dönüş ediblər.
Bu qələbədən sonra xalını 44-ə çatdıran "Neftçi" yenidən liderliyə yüksəlib. "Sumqayıt" isə 16 xalla sonuncu yerdədir.
Qeyd edək ki, turun digər görüşlərində "Qəbələ" "Səbail"i 2:1, "Keşlə" isə "Sabah"ı 3:0 hesabı ilə məğlub edib. "Qarabağ" - "Zirə" qarşılaşması isə qolsuz yekunlaşıb.
-----------------------------
Azərbaycan Premyer Liqasında XX turun daha bir oyunu keçirilib.
Sportnet.az-ın məlumatına görə, Qəbələ şəhər stadionunda eyniadlı komanda "Səbail"i qəbul edib. Baş hakim İnqilab Məmmədovun idarə etdiyi qarşılaşma meydan sahiblərinin qələbəsi ilə yekunlaşıb - 2:1.
İlk yarıda tərəflərdən heç biri qol vura bilməyib. Fasilədən sonra "qırmızı-qaralar" sürətli qollarla istəklərinə çatıblar. Ceyms Adeniyi 49 və 55-ci dəqiqələrdə çoxgedişli kombinasiyaları dəqiq zərbələrlə tamamlayıb. Bununla da nigeriyalı yarımmüdafiəçi aktivindəki qolların sayını 8-ə çatdırıb.
73-cü dəqiqədə isə "Qəbələ" azlıqda qalıb. Bəhlul Mustafazadə ikinci sarı vərəqəni alaraq, meydandan kənarlaşdırılıb. "Səbail" say üstünlüyündən təsəlli qolunu vurmaqla yararlanıb. 84-cü dəqiqədə künc zərbəsindən sonra yeni transfer Elvin Yunuszadə başla topu tora göndərib. Qalan dəqiqələrdə qonaqlar hesabı bərabərləşdirmək imkanlarından yararlana bilməyiblər.
Beləliklə, bu qələbə sayəsində xallarını 28-ə çatdıran "Qəbələ" 3-cü pillədəki "Səbail"lə xal fərqini 3-ə endirib.
Qeyd edək ki, turun açılış oyununda "Keşlə" "Sabah"ı darmadağın edib - 3:0. "Qarabağ" - "Zirə" matçı isə qolsuz yekunlaşıb. Tura bu gün saat 16:30-da başlanacaq "Sumqayıt" - "Neftçi" matçı ilə yekun vurulacaq.
-----------------------
Bu gün Azərbaycan Premyer Liqasında XX turun daha iki oyunu keçiriləcək.
Sportnet.az xəbər verir ki, hər iki qarşılaşma Bakıdan kənarda olacaq. Əvvəlcə “Qəbələ” doğma meydanda “Səbail”i sınağa çəkəcək. Hazırda əyalət təmsilçisi 25 xalla 4-cü, paytaxt klubu isə 31 xalla 3-cü pillədə qərarlaşıb. “Səbail” son iki oyunda rəqibinə qol vura bilmir. “Qəbələ” isə evdəki qarşılaşmalarda paytaxt klubuna uduzmayıb və hamısında qol vurmağı bacarıb. Meydan sahiblərinin kapitanı Cavid Hüseynov sarı vərəqə limitini doldurduğu üçün bu görüşdə iştirak etməyəcək.
Premyer Liqanın birinci dövrəsindəki matçda "Qəbələ" böyük hesablı qələbə qazanıb - 3:0. İkinci dövrədəki oyunda isə qapılara qol vurulmayıb.
Tura Sumqayıtda yekun vurulacaq. Şəhərin eyni adlı komandası “Kapital Bank Arena”da çempionluğa iddialı “Neftçi” ilə münasibətlərinə aydınlıq gətirəcək. Son üç görüşdə rəqibinə uduzmayan flaqman “Qarabağ”ın xal itirməsindən yararlanaraq vahid lider olmağa çalışacaq. “Gənclik şəhəri” təmsilçisi isə son pillədən qurtulmaq niyyətindədir. Hazırda “Neftçi” 41 xalla ikinci, “Sumqayıt” 16 xalla sonuncu-səkkizincidir.
"Neftçi"nin iki futbolçusu bu görüşü buraxacaq. Yarımmüdafiəçi Soni Mustivar sarı vərəqə limitini doldurubsa, Məhəmməd Mirzəbəyov ötən tur "Sabah"la görüşdə qırmızı vərəqə aldığı üçün Sumqayıt səfərində meydana çıxmayacaq.
İlk dövrədə flaqman səfərdə rəqibini 2:0 hesabı ilə üstələyib. İkinci dövrədəki görüş qolsuz yekunlaşıb.
Qeyd edək ki, turun digər oyunlarında “Keşlə” “Sabah”ı 3:0 hesabı ilə üstələyib. “Qarabağ” – “Zirə” matçı isə qolsuz bərabərliklə başa çatıb.
Azərbaycan Premyer Liqası, XX tur
10 mart (bazar)
14:00. “Qəbələ” – “Səbail” - 2:1
Qol: Ceyms Adeniyi, 49; 55
Hakimlər: İnqilab Məmmədov, Pərvin Talıbov, Cavanşir Yusifov, Rövşən Rəcəbov
Hakim-inspektor: Fazil Mürşüdov
AFFA nümayəndəsi: Erkin Hüseynov
Qəbələ şəhər stadionu
İlk 2 dövrədəki oyunlar: 3:0, 0:0
16:30. “Sumqayıt” – “Neftçi” - 1:2
Qollar: Peyman Babayi, 26 - Mamadu Mboc, 76. Ömər Buludov, 87
Qırmızı vərəqə: Mehdi Cənnətov, 77 ("Sumqayıt")
Hakimlər: Rəşad Əhmədov, Vüqar Bayramov, Qəzənfər Məmmədov, Nicat İsmayıllı
Hakim-inspektor: Əhmədağa Cabbarov
AFFA nümayəndəsi: Ələddin Ələkbərov
“Kapital Bank Arena”, 16:30
İlk 2 dövrədəki oyunlar: 0:2, 0:0.
