UEFA Çempionlar Liqasında 1/8 final mərhələsinin daha iki oyunu keçirilib. Sportnet.az-ın məlumatına görə, bu dəfə qarşılaşmalar İngiltərə və İtaliyada təşkil olunub.
Çempionlar Liqasının son finalçısı "Tottenhem" Almaniya "Leyptsiq"ini qəbul edib. Görüş qonaqların qələbəsi ilə yekunlaşıb. 58-ci dəqiqədə Timo Verner türkiyəli referi Cüneyt Çakırın təyin etdiyi penaltini dəqiq yerinə yetirib.
İtaliyada isə Çempionlar Liqasının debütantı "Atalanta" İspaniya "Valensiya"sını qəbul edib. Qarşılaşma meydan sahiblərinin böyük hesablı qələbəsi ilə yekunlaşıb - 4:1. "Cüzeppe Meatsa" stadionunda keçirilmiş qarşılaşmada hesabı Hans Hatebur açıb. 42-ci dəqiqədə Yosip İliçiç ikinci, 58-ci dəqiqədə Remo Froyler üçüncü, 63-cü dəqiqədə isə Hatebur özünün ikinci, komandasının dördüncü topunu vurub. Qonaq komandadan təsəlli qoluna rusiyalı Denis Çerışev 66-cı dəqiqədə imza atıb.
Cavab görüşləri martın 10-da keçiriləcək.
Qeyd edək ki, ilk oyun günündə "Atletiko" İspaniyada Çempionlar Liqasının son qalibi İngiltərə "Liverpul"unu 1:0, Almaniyanın "Borussiya" (Dortmund) komandası isə Fransa PSJ-sini 2:1 hesabı ilə yenib.
Çempionlar Liqası
1/8 final mərhələsi, ilk oyunlar
19 fevral
24:00. "Atalanta" (İtaliya) - "Valensiya" (İspaniya) - 4:1
Qollar: Hans Hatebur, 16; 63. Yosip İliçiç, 42. Remo Froyler, 58 - Denis Çerışev, 66
Baş hakim: Maykl Oliver (İngiltərə)
"San Siro" stadionu
24:00. "Tottenhem" (İngiltərə) - "Leyptsiq" (Almaniya) - 0:1
Qol: Timo Verner, 58 (pen.)
Baş hakim: Cüneyt Çakır (Türkiyə)
"Tottenhem" stadionu
-------------------------
Bu gün UEFA Çempionlar Liqasında 1/8 mərhələsinin növbəti oyunları keçiriləcək.
Sportnet.az-ın məlumatına görə, ikinci oyun günündə də iki matç baş tutacaq. "Atalanta" İtaliyada İspaniyanın "Valensiya" komandasını qəbul edəcək. Meydan sahiblərinin heyətində itki yoxdur. "Yarasalar"da isə müdafiəçi Kristiano Piççini və yarımmüdafiəçi Manu Vellexo zədəlidir. Qapıçı Yasper Sillessen, yarımmüdafiəçi Denis Çerışev və hücümçu Kevin Qameyronun matçda iştirakı sual altındadır.
Günün digər qarşılaşmasında "Tottenhem" İngiltərədə Almaniya "Leyptsiq"ini qəbul edəcək. London klubunda yarımmüdafiəçi Mussa Sissoko və hücumçu Harri Keynin zədə səbəbindən oyunu buraxacağı dəqiqdir. Qonaqlarda isə itkilər daha çoxdur. Müdafiəçilər Villi Orban ilə İbrahim Konate, yarımmüdafiəçilər Teyler Adams ilə Kevin Kampl zədəli olduqları üçün qarşılaşmada iştirak etməyəcəklər.
