Azərbaycanın cüdoçu qadınlardan ibarət milli komandasının baş məşqçisi Elçin İsmayılovun "Report”un suallarını cavablandırıb.
Sportnet.az həmin müsahibəni təqdim edir.
- Rəhbərlik etdiyiniz komandanın üzvləri İslamiadada 1 qızıl, 5 gümüş, eləcə də, komanda yarışında gümüş medal qazandılar. Yetirmələrinizin çıxışını necə qiymətləndirirsiniz?
- Üç aydır yığmadayam, cüdoçularımızdakı böyük həvəsi görürdüm. Onların uğurla çıxış edəcəklərinə inanırdım. Ümidlərimizi doğrultdular. Hamısını təbrik edirəm. Qarşıda bizi Macarıstanda keçiriləcək dünya çempionatı gözləyir. Orada da yaxşı çıxış etməyə çalışacağıq.
- Yığmaya yeni cəlb olunmuş əcnəbi cüdoçuların çıxışından razı qaldınız?
- Bəli. Düzdür, daha yaxşı nəticə gözləyirdik. Lakin bir az gərginlik oldu. Onların gəlişindən sonra yarışa az müddət qalmışdı. Uyğunlaşmaları üçün vaxt lazımdır. Ancaq gələcək üçün ümidlərimiz böyükdür.
- Onların arasında İslamiadada yaxşı təsir bağışlamadığı üçün əməkdaşlığı davam etdirməmək istədiyiniz var?
- Xeyr, elə bir şey yoxdur. Hiss olunur, ki növbəti yarışlara daha yaxşı hazır olacaqlar. Nəticə verəcəklərinə yüz faiz əminəm.
- Karyerasını bitirən Kifayət Qasımova fikrini dəyişərək İslamiadaya qatıldı və gümüş medal əldə etdi. Bundan sonra necə olacaq?
- Məncə, o, daha heç bir yarışda iştirak etmək istəmir.
- Onun yığmaya köməkçi-məşqçi kimi cəlb oluması mümkündür?
- Bunu zaman göstərəcək.
- Azərbaycan Cüdo Federasiyasının vitse-prezidenti Sadıq Sadıqov bildirib ki, qadınlardan ibarət cüdo yığmasında həll olunası problemlər var...
- O, rəhbərimizdir, hər şeyi gözəl bilir. Bizə hər cür şərait yaradılıb. Bunun qarşılığını vermək üçün çalışmalıyıq.
