Azərbaycan Yay Olimpiya OyunlarınDA bürünc medal göstəricisini yaxşılaşdırıb. Sportnet.az-ın məlumatına görə, ölkəmiz "Rio-2016" olimpiadasında bu əyarlı 6 medalı rəsmiləşdirib. Onların sahibləri yunan-Roma güləşçiləri Rəsul Çunayevlə (66 kq) Sabah Şəriəti (130 kq), qadın güləşçi Natalya Sinişin, kayakçı İnna Osipenko-Radomskaya (1 nəfərlik qayıqla 200 metr məsafəyə yürüşdə, bürünc), taekvondoşu Patimat Abakatrova (49 kq) və boksçu Kamran Şahsuvarlıdır (75 kq). Digər boskçumuz Lorenzo Sotomayor da ən azı bürünc mükafatı özünə təmin etsə də, medalının əyarı yarıda çıxışını başa vurduqdan sonra müəyyənləşəcək.
Ölkəmiz olimpiadada ilk "bürünc"u "Sidney-2000"-də boksçu Vüqar Ələkbərovla qazanıb. "Afina-2004"də bu əyarlı 4 medalımız olub. Onları atıcılar İradə Aşumova ilə Zemfira Meftahətdinova və boksçular Fuad Aslanovla Ağası Məmmədov qazanıblar. "Pekin-2008"də də 3 "bürünc"ümüz olub - sərbəst güləşçilər Mariya Stadniklə Xetaq Qazyumov və boskçu Şahin İmranov. Nəhayət, "London-2012"də 6 idmançımız 3-cü yeri tutub. Bunlar ağır atlet Valetin Xristov, güləşçilər Emin Əhmədov (yunan-Roma), Yuliya Ratkeviç, Xetaq Qazyumov (hər ikis sərbəst) və boksçular Teymur Məmmədovla Məhəmmədrəsul Məcidovdur.
Azərbaycanın "Rio-2016"da olan 4 gümüş medalı da artıq rekorddur. Çünki bunadək ən yaxşı halda 2 "gümüş"ümüz olub ki, ona da son olimpiadada imza atmışıq. Cüdoçular Rüstəm Orucovla Elmar Qasımov Braziliyada 2-ci olmaqla, bu əyarlı medal sayında göstəricimizi təkrarladılarsa, əslən Ukraynadan olan güləşçi Mariya Stadniklə kayakçı Valentin Demyanenko onu xeyli yaxşılaşdırdılar.
Xatırladaq ki, ölkəmizın qızıl medalda ən yüksək göstəricisi "Sidney-2000"də və "London-2012"də olub - hərəyə 2 qızıl. Azərbaycanın "Rio-2016"da hələ ki bu əyarlı medalı yoxdur.
Mehman Süleymanov
