Futbol üzrə Gürcüstan millisinin baş məşqçisi Kaxaber Tsxadadze sabiq komandası Bakı "İnter"inin Avropa Liqasının I təsnifat mərhələsinin ilk görüşündə Albaniyada "Laçi"yə qarşı görüşdən 1:1 hesablı heç-heçə ilə ayrılmasına münasibət bildirib. 47 yaşlı mütəxəssis Sportnet.az-a açıqlamasında bu nəticəni təbii qarşıladığını vurğulayıb.
K.Tsxadadze deyib ki, bu, son 5 ildə apardıqları işlərin və uğurlu nəticələrlə UEFA əmsallar cədvəlində yüksək reytinq toplamalarının nəticəsidir: "Məhz yüksək reytinq səbəbindən "İnter"ə Avropa Liqasının ilk 2 mərhələlərində münasib rəqib düşüb. Mən keçmiş komandamın III təsnifat mərhələsinədək irəliməyə qadir olduğunu düşünürəm".
Qeyd edək ki, "İnter"lə "Laçi" arasındakı cavab görüşü iyulun 9-da Bakıda təşkil olunacaq. Qalib komanda II təsnifat mərhələsində SJK(Finlandiya) - "Hafnarfyordur” (İslandiya) cütünün qalibi ilə üz-üzə gələcək.
