Avropa Liqasında II təsnifat mərhələsində İslandiya "Hafnarfyördur"u ilə qarşılaşacaq Bakı "İnter"inin paytaxtdakı hazırlıqlarında ötən gün ispaniyalı futbolçu İvan Benites də qatılıb. Sportnet.az xəbər verir ki, "Barselona"nın sabiq mərkəz müdafiəçisi "İnter"ə qayıtmağa qərar verib.
Benites bu gün klubun verdiyi iftar süfrəsində də iştirak edib. Klubun analitik məşqçisi Ağakişi Mehdizadə Sportnet.az-a açıqlamasında xəbəri təsdiqləyib. Onun sözlərinə görə, Benites "Hafnarfyordur"la cavab matçında oynaya biləcək: "Biz onunla yeni müqavilə başlayacağıq və adını bu mərhələ oyunları üçün UEFA-ya göndərəcəyik. Bizimlə İslandiyaya getməyəcək. Amma cavab matçında oynaması mümkündür".
Qeyd edək ki, "İnter" iyulun 14-də günorta saatlarında çarter reysi ilə Reykyavikə yola düşəcək. Komanda İslandiyanın paytaxtında məskunlaşacaq. Yalnız məşqlər və oyun üçün Hafnarfyordura gediləcək.
