"Qəbələ"nin futbolçusu Cavid Hüseynov qohumları tərəfindən jurnalist Rasim Əliyevin döyülməsi iddiası ilə bağlı fikirlərini açıqlayıb. Sportnet.az-ın məlumatına görə, klubun mətbuat xidməti vasitəsilə yayılan açıqlamada kapitan adının belə bir məsələdə hallanmasından çox üzgün olduğunu bildirib.
O deyib: "Jurnalist Rasim Əliyev "Qəbələ"-"Apollon" matçının ardından jurnalitlərlə söhbət zamanı göstərdiyim jesti əsas gətirərək məni "tərbiyəsiz, əxlaqsız" adlandırmışdı. Mən də məsələ ilə bağlı Rasim Əliyevə zəng etdim. Mədəni insan kimi haqqımda yanıldığını, jesti düzgün anlamadığını, o jesti dostluq mənasında göstərdiyimi söylədim. Əgər mənim və ailəm haqqında məlumat almaq istəyirsə, məhəlləmizə gəlməsini, qonşularımdan, bizi tanıyanlardan əxlaqım, tərbiyəm və ailəm barədə məlumat almasını tövsiyə etdim. O da məni anladı. Anlaşmazlıq olduğunu, Facebook vasitəsilə məndən üzr istəyəcəyini dedi. Normal şəkildə vidalaşdıq".
Hüseynov sonradan baş verənlərdən xəbərsiz olduğunu açıqlayıb: "Məsələni araşdırırıq. Yəqin sabah məsələyə tam aydınlıq gələcək".
