Hazırda Almaniyanın Dortmund şəhərindəki BVB stadionunda davam edən "Borussiya" - "Qəbələ" matçını azərbaycanlı azarkeşlər də izləyir. Sportnet.az-ın oyunda olan əməkdaşının verdiyi məlumata görə, qonaq komanda üçün ayrılmış sektorda 100-dək fanat yer alıb.
Onlar əllərində Azərbaycan bayrağı tutmaqdan əlavə, tribunaya böyük Türkiyə bayrağı da səriblər. Amma həmin tərəfdarların səsi çoxsaylı yerli publikanın mahnı sədaları altında eşidilməz olub.
Bundan başqa, oyunun əvvəllərində sektorlardan birində Ermənistan bayrağı görünüb. Amma həmin bayraq dərhal yoxa çıxıb. Buna "Qəbələ" rəsmilərinin etirazı səbəb olub.
Qeyd edək ki, ilk yarıdan sonra "Borussiya" öndədir - 2:0.
