"Qəbələ” Avropa Liqasının qrup mərhələsinin V turunda Yunanıstanda PAOK-la keçirəcəyi oyunun hazırlıqlarına bir günlük aradan sonra start verib. Sportnet.az-ın məlumatına görə, "qırmızı-qaralar” bu gün Qəbələdə məşq keçib.
Azərbaycan Premyer Liqasında XIII turun "Sumqayıt"la görüşündə (2:2) iştirak edənlər fiziki hazırlıqla kifayətlənibsə, digər oyunçular topla məşq edib. Sabah "qırmızı-qaralar” Qəbələ şəhər stadionunda növbəti məşqini gerçəkləşdirəcək. Hazırlıq prosesi səhər baş tutacaq. "Qəbələ” Salonikiyə noyabrın 25-də yollanacaq. Oyunöncəsi son məşq də qarşılaşmanın keçiriləcəyi arenada baş tutacaq.
Qeyd edək ki, qrupda son səfər oyununa çıxacaq "Qəbələ"nin PAOK-la noyabrın 26-da baş tutacaq qarşılaşması yerli vaxtla saat 22:05-də (Bakı vaxtı ilə 27 noyabr saat 00:05-də) başlayacaq. Salonikidəki "Tumba" stadionunda keçiriləcək oyunu danimarkalı hakimlər briqadası idarə edəcək.
