Bakının 8-ci km qəsəbəsindəki "Bakcell Arena" təmirə bağlanıb. Bu barədə Sportnet.az-a stadionda ev oyunlarını keçirən "Neftçi" klubunun vitse-prezidenti Tahir Süleymanov məlumat verib.
Onun sözlərinə görə, məqsəd arenanın ot örtüyünü yüksək səviyyəyə çatdırmaqdan ibarətdir. Süleymanov bildirib ki, qarşıdakı ev oyunlarından Serbiya "Partizan"ı ilə Avropa Liqasının "pley-off" mərhələsinin cavab görüşü Tofiq Bəhramov adına Respublika stadionunda olacaq. Topaz Premyer Liqasının IV turunda avqustun 31-də nəzərdə tutulan "Simurq"la matça gəldikdə, "Bakcell Arena" həmin vaxtadək hazır olmasa, qarşılaşma İsmət Qayıbov adına Bakıxanov qəsəbə stadionunda olacaq.
Qeyd edək ki, sonuncu dəfə "Bakcell Arena"da Azərbaycan milli komandası avqustun 20-də Özbəkistan yığması ilə yoldaşlıq görüşü keçirib. Millimiz sentyabrın 9-da məhz bu stadionda Bolqarıstanla 2016-cı il Avropa çempionatının seçmə qrup matçında üz-üzə gələcək.
