"Kubok matçına qədər AZAL klubu ilə çempionat oyunlarında da bir neçə dəfə qarşılaşmışdıq. Son görüş də kifayət qədər gərgin və maraqlı alındı". Sportnet.az-ın məlumatına görə, bu sözləri klubun rəsmi saytına açıqlamasında "Neftçi"nin futbolçusu Erik Ramos deyib.
Braziliyalı belə davam edib: "Bu futboldu və tərəflərdən biri qələbə qazanmalıdır. Tərlan Əhmədov AZAL klubundan əvvəl "Neftçi"də köməkçi məşqçi və baş məşqçi əvəzi işləyib. Hələ o vaxtdan bilirdik ki, Tərlan Əhmədov ispan dilində başa düşmür. Əgər oyunda işlətdiyim hər hansı ifadəni Tərlan Əhmədov söyüş kimi başa düşübsə bu mənim günahım deyil. AZAL klubu ilə oyunda qayda pozuntusuna yol verdim və hakim də mənə sarı vərəqə göstərdi. Orada heç bir təhqiramiz söz işlətməmişəm. Sadəcə bu cür açıqlamalar verməklə ictimaiyyətdə mənfi rəy formalaşdırmaq cəhdi yanlışdır".
Qeyd edək ki, AZAL - "Neftçi" qarşılaşması 0:1 hesabı ilə başa çatıb.
